Віктар Івашкевіч днямі адбывае на “хімію” :: Хартыя'97 :: Навiны

У Камітэце выкананьня пакараньняў зараз вырашаюць, у які горад накіраваць рэдактара газэты “Рабочы”, асуджанага на два гады абмежаваньня волі за артыкул “Злачынца мусіць сядзець у турме”, надрукаваны ў “Рабочым” падчас выбарчай кампаніі. Першамайскі суд Менску палічыў гэты артыкул паклёпам на Лукашэнку і ягонае атачэньне. “Мяне выклікалі ў Савецкі РУУС. Там забралі ваенны білет, пашпарт і зьнялі адбіткі пальцаў. Мне пацьвердзілі, што цягам дзесяці дзён мяне выклікаюць, і скажуць, у які горад мне рушыць. Вось на сёньня я ў чаканьні гэтай “камандзіроўкі”, - паведаміў Радыё Свабода Віктар Івашкевіч.

Вышэйшая судовая інстанцыя пацьвердзіла рашэньне раённага суда па справе журналіста, але Менскі гарадзкі суд да гэтага часу не абвесьціў Віктару Івашкевічу амністыю. Згодна Крымінальна-працэсуальнага Кодэксу ўсім асуджаным і тым, хто адбывае пакараньне ў год, калі была агучаная амністыя, скарачаецца тэрмін пакараньня. Таму на “хіміі” Віктар Івашкевіч павінен правесьці не два, а адзін год.
“Я зьвярнуўся з заяваю, каб мне далі тлумачэньне адносна амністыі, наколькі яна можа быць прымененая да мяне. І адвакат, і судзьдзя раённага суда ў прыватнай размове сказалі, што я падпадаю пад амністыю. Але самі судзьдзі ні раённага, ні гарадзкога ўзроўняў такога рашэньня не абвесьцілі. Вось я і падаў заяву. Мне сказалі: “Будзем думаць і глядзець,” – распавёў журналіст.
Нагадаем, што ўжо тры месяцы на “хіміі” адбываюць пакараньне рэдактар газэты «Пагоня» Мікалай Маркевіч і журналіст Павел Мажэйка.