Свавольнага сьвятара пазбавілі права праводзіць богаслужбы :: Хартыя'97 :: Навiны

Настаяцель берасьцейскага храма Ціхвінскай іконы Божай маці пратаярэй Ян (Грудніцкі) рашэньнем Берасьцейска-Кобрынскай япархіі пазбаўлены права праводзіць богаслужэньні “праз парушэньне царкоўнай дысцыпліны і зьнявагу апостальскіх правілаў” да раскаяньня.

Настаяцелем царквы Ціхвінскай іконы Божай маці прызначаны айцец Ігнацій. Аднак, як мяркуюць у епархіяльным упраўленьні Берасьцейска-Кобрынскай япархіі, канфлікт ня вырашаны. Сьвятар адмовіўся ад прыходу ў Жабінкаўскім раёне і зараз знаходзіцца не пры справе, хоць і не пазбаўлены сана і не адлучаны ад царквы.
Ян Грудніцкі некаторы час таму быў настаяцелем Сьвята-Сімяёнаўскай царквы – катэдральнага сабору Берасьйска-Кобрынскай япархіі, айца Яна перавялі настаяцелем храма Ціхвінскай іконы Божай Маці, які будаваўся зь ягонай ініцыятвы. Аднак у канцы лістапада пратаярэй быў выведзены па-за штат Расейскай праваслаўнай царквы (РПЦ). Афіцыйная вэрсія – развод з жонкай і другая жаніцьба. Сам сьвятар лічыць, што гэта надуманая прычына.
Паводле БелаПАН, айцец Ян зьвяртаўся ў берасьцейскую грэка-каталіцкую царкву сьвятых Пятра і Паўла (уніяцкую) і да кіраўніцтва Беларускай аўтакефальнай праваслаўнай царквы (БАПЦ), зарэгістраванай у ЗША. Сам сьвятар абвяргае меркаваньні наконт таго, што ён зьбіраўся сыйсьці з РПЦ і зрабіць прыход царквы Ціхвінскай іконы Божай маці прыходам БАПЦ. У мінулыя выходныя айцец Ян адмовіўся перадаць япархіі ключы ад царквы Ціхвінскай іконы Божай Маці і заявіў, што царква будавалася на ягоныя грошы. Прыхаджанам і новаму настаяцелю давялося ламіць дзьверы ў прысутнасьці супрацоўнікаў праваахоўчых органаў. Чым скончыцца канфлікт, пакуль невядома. Кіраўніцтва япархіі чакае ад айца Яна пакаяньня, але сам ён ніякіх крокаў насустрач ня робіць.
За гэты год канфлікт з айцом Янам – другі сур’ёзны канфлікт у Берасьцейска-Кобрынскай япархіі. Першы адбыўся ў царкве сьвятых Пятра і Паўла ў Ружанах Берасьцейскай вобласьці, дзе нават умяшальніцтва кіраўніцтва япархіі ня здолела вырашыць канфлікт паміж двума сьвятарамі і прыхаджанамі.