У Беларусь не пусьцілі экспэртаў з Румыніі і Чэхіі :: Хартыя'97 :: Навiны

Беларускія ўлады ня выдалі візы былому назіральніку за леташнімі прэзыдэнцкімі выбарамі ад місіі БДІПЧ АБСЭ Адрыяну Марару з Румыніі і прадстаўніку чэскай праваабарончай арганізацыі “Чалавек у бядзе” Робэрту Баху. Бах і Марару плянавалі прыехаць у Менск, каб удзельнічаць у канфэрэнцыі “Міжнародныя стандарты дэмакратычных выбараў і беларускае выбарчае заканадаўства”.

Адрыян Марару і Робэрт Бах зьвярнуліся па візы ў беларускую амбсаду ў Бухарэсьце і Празе яшчэ некалькі тыдняў таму. Супрацоўнікі амбасады доўга не давалі ніякага адказу і, у рэшце рэшт, паведамілі, што ня могуць ім выдаць візаў, бо да пачатку менскай канфэрэнцыі засталося мала часу.
Адзін з арганізатараў канфэрэнцыі, прадстаўнік праваабарончага цэнтру “Вясна” Валянцін Стэфановіч паведаміў Радыё Свабода, што Адрыян Марару нават спрабаваў аформіць візу праз адну румынскую турфірму, але безвынікова. Пасьля звароту ў беларускую амбасаду супрацоўнікі турфірмы распавялі Марару, што ягонае прозьвішча пазначанае ў нейкім адмысловым сьпісе асобаў, якім непажадана выдаваць беларускія візы.
Вось што паведаміў з гэтай нагоды прэс-сакратар Міністэрства замежных справаў Павал Латушка:
“Што тычыцца Румыніі, звароту ў амабасаду Беларусі ў Бухарэсьце па справе аб выдачы візаў згаданай асобе не было. Што нібыта да нявыдачы візаў яшчэ аднаму патынцыйнаму ўдзельніку згаданай канфэрэнцыі ў Чэхіі, то хацеў бы падкрэсьліць, што быў вусны зварот у нашую амбасаду. Былі пададзеныя адпаведныя звароты аб парадку атрыманьня візаў у Рэспубліку Беларусь. Але візавая анкета, ці візавая заяўка ў амбасаду таксама ня трапіла”.
Аднак арганізатар канфэрэнцыі, кіраўнік праваабарончага цэнтру “Вясна” Алесь Бяляцкі ў інтэрвію Радыё Свабода пацьвердзіў, што румынскаму і чэскаму калегам ня выдалі візаў і выказаў сваю вэрсію гэтага кроку беларускіх уладаў:
“Што да румынскага дасьледніка заканадаўства аб выбарах, то ён летась быў доўгатэрміновым назіральнікам місіі БДІПЧ у Беларусі, і гэтая нявыдача візы зьяўляецца перастрахоўкай уладаў. Яны баяцца, што гэтыя назіральнікі могуць тут зьявіцца ў часе кампаніі ў мясцовыя Саветы.
Што тычыцца чэскага прадстаўніка праваабарончай арганізацыі, то мне падаецца, яму ня выдалі візы зь іншае прычыны. А менавіта з-за адмовы ўпусьціць Лукашэнку на саміт НАТО ў Празе. Такім чынам, беларускія ўлады далі нягучны загад усяляк тармазіць, стрымліваць узаемаадносіны паміж Беларусяй і Чэхіяй”.
Нагадаем, што назіральнікі місіі БДІПЧ АБСЭ не прызналі леташнія прэзыдэнцкія выбары ў Беларусі свабоднымі і дэмакратычнымі.