Кангрэсмэн Уэлдан: Гэта абуральная хлусьня :: Хартыя'97 :: Навiны

Кангрэсмэн Курт Уэлдан, які ачольваў дэлегацыю Кангрэсу ЗША, што знаходзілася ў Менску зь візытам 3-4 сьнежня і сустракалася з Аляксандрам Лукашэнкам, зьвярнуўся да Амбасады ЗША ў Менску з просьбай распаўсюдзіць наступную прадыктаваную ім заяву: “Я катэгарычна абвяргаю інфармацыю прэсавага рэлізу Прэзыдэнта Беларусі Лукашэнкі ад 4 сьнежня. Мяне пужае, як мог быць прыняты такі бессаромны крок і агучаная такая абуральная хлусьня. Многія з палажэньняў прэс-рэліза адносна згоды з боку дэлегацыі, якая нібыта мела месца, прапаноўваліся, але былі катэгарычна адвергнутыя. Візыт дэлегацыі ў Менск быў візытам добрай волі. Тое, з чым мы сутыкнуліся, ёсьць палітка нізкай пробы”.

Дэлегацыя ЗША ў складзе члена Палаты прадстаўнікоў амэрыканскага Канрэсу Курта Уэлдана, сэнатара Конрада Бэрнса, члена Палаты прадстаўнікоў Роска Барлета, трох бізнэсоўцаў і супрацоўніка сакратарыяту па пытаньнях узбраеньня Палаты прадстаўнікоў прыбыла ў Менск 3 сьнежня. Мэтай сваго візыту кангрэсмэны назвалі нармалізацыю стасункаў паміж ЗША і Беларусяй, а таксама паміж Беларусяй і АБСЭ. У часе свайго візыту амэрыканскія палітыкі сустрэліся з Аляксандрам Лукашэнкам і шэрагам беларускіх апазыцыйных палітыкаў.
Прэсавая служба Аляксандра Лукашэнкі, а таксама ўсе падкантрольныя дзяржаве СМІ, назвалі гэты візыт пачаткам “новага, канструктыўнага этапу ў адносінах Рэспублікі Беларусь з ЗША і эўрраатлянтычнай супольнасьцю”. У прэсавым рэлізе, распаўсюджаным прэсавай службай Лукашэнкі, гаворыцца: "Падчас сустрэчы з Лукашэнкам амэрыканскія кангрэсмэны не абыйшлі ўвагай тэму мінулых прэзыдэнцкіх выбараў. Як падкрэсьліў кіраўнік дэлегцыі Кангрэсу ЗША, Прэзыдэнт Беларусі абраны сумленным і дэмакратычным шляхам і прынёс новыя павевы ў разьвіцьцё нашай краіны”.
Прэсавая служба Лукашэнкі таксама паведаміла, што “прадстаўнікі заканадаўчай улады ЗША выказалі гатоўнасьць да ўсталяваньня ў пэрспэктыве адсносінаў зь дзейным Парлямэнтам Рэспублікі Беларусь".
Больш за тое, згодна паведамленьню прэсавай службы кіраўніка дзяржавы, “кангрэсмэны намерваюцца рэкамэдаваць Адміністрацыі Злучаных Штатаў і Дзяржаўнаму дэпартамэнту адмяніць візавыя абмежаваньні адносна службовых асобаў Рэспублікі Беларусь".
Усё гэта сёньня абверг кіраўнік дэлегацыі Кангрэсу ЗША.