Грошы ад продажу акцыяў “Славнефти” пайшлі ў кішэню беларускіх чыноўнікаў? :: Хартыя'97 :: Навiны

Зьдзелка па продажу беларускага пакету (10,83 адсоткі) акцыяў “Славнефти”, што адбылася ў пятніцу, абрасла за мінулыя выходныя чуткамі. Як паведамляе “Коммерсантъ” са спасылкаю на ананімных беларускіх бізнэсоўцаў, “Сибнефть” “дадала” да кошту пакету яшчэ 10 адсоткаў, якія, аднак, пайшлі не ў дзяржбюджэт, а ў кішэню чыноўнікаў, якія мелі дачыненьне да зьдзелкі. Згодна другой вэрсіі газэты, - сума зьдзелкі была канчаткова вызначаная на сустрэчы Пуціна і Лукашэнкі, дзе расейскі прэзыдэнт здолеў пераканаць беларускага лідэра ў тым, што ня можа паўплываць на кіраўніцтва прыватнай расейскай кампаніі.

Беларуская валютна-фондавая біржа аб’явіла аб продажу беларускага пакету акцыяў (10,83) кампаніі “Славнефть” у пятніцу 6 сьнежня. Пакет набыла расейская кампанія “Сибнефть” праз “Славнефтебанк” за мінімальны кошт, на які разьлічвала Беларусь – 207 мільёнаў даляраў ЗША. Да гэтага, два тыдні беларускія чыноўнікі на перамовах з прадстаўнікамі “Сибнефти” спрабавалі падняць кошт пакету да 300 мільёнаў, аднак ім гэтага не ўдалося.
Як піша “Коммерсантъ”, продаж беларускіх акцыяў “Славнефти” выглядаў благой камедыяй: штодзень цягам двух тыдняў беларускія чыноўнікі пераносілі таргі на заўтра і заклікалі жадаючых падаваць новыя заяўкі. Новых заявак не паступала. Набыць маёмасьць рэспублікі за $207 млн. была гатовая толькі “Сибнефть”, якая праз сваю панамскую афшорную кампанію падала заяўку "Славнефтебанку", што меў допуск на беларускую біржу.
Увесь гэты час беларускія чыноўнікі пераконвалі “Сибнефть” павялічыць кошт, у ідэале – да $300 млн. Перамовы, паводле дадзеных Ъ, завяршыліся ў сераду – Беларусь здалася. Удзельнікі перамоваў пагадзіліся на 6,6 млрд. расейскіх рублёў. Увесь чацьвер і першую палову пятніцы беларускія чыноўнікі рыхтавалі для Аляксандра Лукашэнкі аргумэнтаваную справаздачу – чаму ўрад задавальняе кошт зьдзелкі, а Генадзь Падгорны, старшыня Фонду па кіраваньню дзяржмаёмасьцю Беларусі, раіўся з першым віцэ-прэм’ерам ураду Сяргеем Сідорскім. У 14.00 у пятніцу спадар Сідорскі ўвайшоў у кабінэт Лукашэнкі з чырвонай тэчкай з грыфам “звыштаемна”. У ёй быў праект урадавай пастановы па паперах “Славнефти”.
Неафіцыйная інфармацыя аб тым, што зьдзелка ўхваленая, зьявілася ў 15.00. У 16.30 праца БВФБ была падоўжаная на дзьве гадзіны – да 18.30. Да гэтага часу адмысловая рабочая група на чале з спадаром Падгорным аформіла ўсе дакумэнты, якія пацьвярджаюць факт зьдзелкі. У 20.30 на сайце біржы зьвілася інфармацыя аб продажы беларускай долі “Славнефти”. “Сибнефть” пакуль не дае камэнтараў па зьдзелцы, спасылаючыся на адсутнасьць афіцыйных дакумэнтаў ад беларускага боку, аднак і не абвяргае інфармацыі аб набыцьці.
У Менску абмяркоўваюць дзьве вэрсіі таго, чаму беларускі ўрад, які два тыдні адмаўляўся прадаць акцыі па “заніжаным” кошце, зьмяніў сваё рашэньне. Паводле першай – канчатковая дата продажу была вызначаная яшчэ 27 лістапада ў Маскве падчас сустрэчы прэзыдэнтаў Расеі й Беларусі. Прэзыдэнт Пуцін нібыта пераканаў калегу Лукашэнку ў тым, што ня можа паўплываць на кіраўніцтва “Сибнефти” – прыватнай кампаніі.
Другую вэрсію выказваюць беларускія бізнэсоўцы (ананімна, улічваючы пікантнасьць сытуацыі): “Сибнефть” нібыта павялічыла суму на 10% ад першапачатковай, але гэтая розьніца не трапіць у бюджэт, а будзе разьмеркаваная паміж беларускімі чыноўнікамі, датычнымі да зьдзелкі.
Беларусь атрымае грошы 11 сьнежня і адразу ж верне іх большую частку ў Расею. Нагадаем, “Газпром” патрабуе, каб рэспубліка да канца году пагасіла $80 млн. пазык за пастаўлены газ (у наступным годзе Беларусь павінна будзе заплаціць $153 млн.). Пастаўка ў рэспубліку 1,5 млрд. кубамэтраў прыроднага газу НДК “Итера” ($38 за тысячу кубамэтраў) будзе каштаваць $55 млн.
Адзначым, што за пятніцу акцыі “Сибнефти” на расейскім фондавым рынку вырасьлі ў кошце на 6%. Інвэсткампаніі надалі вялікае значэньне заяве НК ЛУКОЙЛ аб адмове ад удзелу ў аўкцыёне па расейскім дзяржпакету “Славнефти” (Ъ пісаў пра гэта 6 сьнежня). Але яшчэ больш іх цікавіла інфармацыя агенцтва "Интерфакс", у якой Генадзь Падгорны зрабіў асьцярожную заяву: “Ёсьць некаторая надзея, што ўрад Беларусі і пакупнік змогуць знайсьці кошт, які задаволіць абодва бакі”. Інвэстары зрабілі з гэтай фразы выснову, што “Сибнефть” здолела пераканаць беларускія ўлады і што продаж рэспубліканскага пакету вось-вось дабудзецца. І не памыліліся.
У апытаных Ъ аналітыкаў інвэсткампаніяў практычна не засталося сумневаў у тым, што і расейскі дзяржпакет “Славнефти” ў выніку дастанецца “Сибнефти”, а яе спарынг-партнёрам на аўкцыёне выступіць Цюменская нафтавая кампанія. Аналітыкаў, зрэшты, насьцярожвае заява Счетной палаты аб тым, што стартавы кошт дзяржпакету павінен складаць $2,5 млрд., а зусім не 1,7 млрд. (гл. Даведку).
Адзначым, што ў Беларусі застаецца 40% акцыяў найбуйнейшага ў рэспубліцы Мазырскага НПЗ (“Славнефти” належыць 42%). Пераможцу аўкцыёна, для таго каб стварыць з “Славнефти” падпарадкаваную ёй структуру, давядзецца выкупаць у Беларусі і гэты пакет.