Перамовы аб аднаўленьні дзейнасьці КНГ АБСЭ ў Беларусі :: Хартыя'97 :: Навiны

пачнуцца 9 сьнежня ў Вене (Аўстрыя) між Арганізацыяй па бясьпецы і супрацоўніцтву ў Эўропе і Беларусяй. Пра гэта, як паведамляе БелаПАН, заявіў 6 сьнежня на брыфінгу міністр замежных справаў Партугаліі Антоніа Марцінэс да Круз.

Паводле міністра, ён атрымаў пісьмовы зварот ад кіраўніка замежнапалітычнага ведамства Беларусі Міхаіла Хвастова, дзе паведамляецца, што афіцыйны Менск “гатовы да пачатку такіх афіцыйных перамоваў”.
Паводле А. да Круз, у аснове перамоваў будуць ляжаць дамоўленасьці, дасягнутыя ў часе нядаўняга (3-4 лістапада) візыту ў Беларусь дэлегацыі АБСЭ. З свайго боку, Менск узяў на сябе абавязацельствы “дасягнуць канкрэтных вынікаў на гэтых перамовах яшчэ да канца году, калі завяршаецца старшынства Патугаліі ў АБСЭ”. Паводле партугальскага міністра, прапановы беларускага боку “даюць падставы для асьцярожнага аптымізму”.
Як ужо паведамляў БелаПАН, Хвастоў прыбыў у Партугалію для ўдзелу ў 10-ым паседжаньні Рады Міністраў замежных справаў дзяржаваў – сябраў АБСЭ. 7 сьнежня на брыфінгу ў Порта (Партугалія) міністар замежных справаў Беларусі заявіў, што будучая місія АБСЭ ў Менску павінна кіравацца ў сваёй дзейнасьці прынцыпамі неўмяшальніцтва ва ўнутраныя справы Беларусі і канструктыўнага супрацоўніцтва з урадам. Мандат групы павінен быць “тэрміновым і адноўленым”, заявіў Хвастоў. “Такая пэрыядычнасьць можа быць ад 6 месяцаў да аднаго году - у залежнасьці ад таго, як мы дамовімся”, - сказаў міністар.
Ён таксама паведаміў, што перамовы аб аднаўленьні дзейнасьці місіі АБСЭ ў Менску павінны будуць весьціся і па складу групы, у якой, паводле Хвастова, “павінен быць грамадзянскі пэрсанал”. Дэлегацыю Беларусі на перамовах у аўстрыйскай сталіцы будзе ачольваць сталы прадстаўнік гэтай краіны ў АБСЭ Віктар Гайсёнак.