Пятая Нацыянальная прэмія за абарону правоў чалавека :: Хартыя'97 :: Навiны

Рашэньне аб прысуджэньні пятай Нацыянальнай прэміі ў галіне абароны правоў чалавека было прынятае аргкамітэтам Хартыі’97 10 сьнежня, у Дзень прыняцьця Ўсеагульнай дэклярацыі правоў чалавека. На паседжаньні аргкамітэту было прынятае рашэньне – у 2002 годзе ўручыць прэмію ў намінацыі “За асабістую мужнасьць”:

ЗІНАІДЗЕ ГАНЧАР – жонцы бязь вестак зьніклага ў 1999 годзе віцэ-сьпікера Вярхоўнага Савету Беларусі 13-га скліканьня Віктара Ганчара;
СЬВЯТЛАНЕ ЗАВАДЗКАЙ – жонцы бязь вестак зьніклага ў 2000 годзе журналіста Зьмітра Завадзкага;
ІРЫНЕ КРАСОЎСКАЙ – жонцы бязь вестак зьніклага ў 1999 годзе бізнэсоўца Анатоля Красоўскага.
Жонкі зьніклых не здаліся, не скарыліся перад самай страшнай трагедыяй у іх жыцьці. Мужныя жанчыны працягваюць задаваць рэжыму нязручныя пытаньні, зноў і зноў удзельнічаюць у акцыях пратэсту, вядуць актыўную міжнародную дзейнасьць.
МІКОЛЕ МАРКЕВІЧУ – галоўнаму рэдактару закрытай уладамі газэты “Пагоня”;
ПАЎЛУ МАЖЭЙКУ – журналісту закрытай уладамі газэты “Пагоня”;
ВІКТАРУ ІВАШКЕВІЧУ – галоўнаму рэдактару газэты “Рабочы”.
Журналісты былі несправядліва асуджаныя за сваю прафэсійную дзейнасьць і асуджаныя да абмежаваньня волі і папраўчых прац за тое, што крытыкавалі ў сваіх выданьнях дзейную ўладу.
Прэмія за абарону правоў чалавека была заснаваная грамадзянскай ініцыятывай Хартыя’97 у 1998 годзе. Прэміяй за ўвесь час яе існаваньня ўзнагароджваліся вядомыя грамадзкія й культурныя дзеячы, творчыя калектывы, палітыкі й журналісты.