Чэкавага аўкцыёну сёлета ня будзе :: Хартыя'97 :: Навiны

Першы сёлета чэкавы аўкцыён урад плянаваў правесьці ў канцы году. Аднак адпаведнай аб’явы так і не зьявілася. Да фінішу застаецца менш за месяц і Фонд дзяржаўнай маёмасьці ўжо ніяк не пасьпее правесьці адкрытыя таргі за прыватызацыйныя чэкі.

Паводле зьвестак “Белорусского рынка” зь інфармаваных крыніц, аўкцыён сёлета плянавалася правесьці 24 сьнежня. Усе дакумэнты для яго арганізацыі былі падрыхтаваныя своечасова – яны прайшлі экспэртызу і ўзгадненьне яшчэ месяц таму. Быў сфармаваны пакет каштоўных папер з разьбізоўкай па лотах, якія ўрад зьбраўся паставіць на аўкцыён. У сьпіс аўкцыёну трапіла каля 40 прадпрыемстваў. Плянавалася, што дзяржава выставіць на продаж за прыватызацыйныя чэкі “Маёмасьць” да 15% сваёй долі ў адкрытых акцыянэрных таварыствах.
Аднак на апошнім этапе Фонду дзяржмаёмасьці далі адбой. У апошні момант віцэ-прэм’ер, міністар эканомікі Андрэй Кабякоў не падпісаў зрыхтаваныя дакумэнты, хоць яго дазвол на правядзеньне чэкавага аўкцыёну папярэдне быў атрыманы.
Спэцыялісты ў разгубленасьці, чаму гэта здарылася. Яшчэ нядаўна ўрад аб’явіў, што намерваецца праз паўгады завяршыць чэкавую прыватызацыю, а зараз пазбаўляе прафудзельнікаў і грамадзян законнай магчымасьці выкарыстоўваць свае чэкі.