Беларускіх прамыслоўцаў пакаралі за пазыкі перад “Газпромам” :: Хартыя'97 :: Навiны

Беларускі ўрад адхіліў ад сваіх пасадаў кіраўнікоў 6 буйных прадпрыемстваў – кіраўніка Сьветлагорскай птушкафабрыкі (В.Грамовіч), Клецкага заводу кансэрваў (Н.Буката), наваполацкага прадпрыемства “Вымяральнік” (Ю.Рэшка), менскага заводу “Тэрмапласт” (А.Карпіловіч), Жлобінскай швачнай фабрыкі (С.Серада), Гомельскага камбінату будаўнічых канструкцыяў (В.Рэнчыкаў) і ДЭХ КУПП ЖКХ г.Пінску (В.Калодзіч). Як паведаміў РІА “Новости” прэсавы сакратар прэм’ер-міністра Беларусі Іван Знаткевіч, такое рашэньне Прэзыдыюм Савету Міністраў краіны прыняў у сувязі з “безадказным падыходам гэтых кіраўнікоў да выкананьня службовых забавязкаў і незахаваньнем імі дысцыпліны па разьліках за спажытыя энэргарэсурсы”.

Паводле яго, Рэспубліканскі штаб па пытаньнях паліва і энэргаашчаднасьці неаднаразова прапаноўваў кіраўнікам вышэйшых зьвёнаў зрабіць больш жорсткай дысцыпліну па плаце за энэргарэсурсы. За несвоечасовыя разьлікі ў лістападзе 2002 году падача прыроднага газу была абмежаваная 218 і спыненная 112 спажыўцам, адзначыў ён. За запазычанасьць у аплаце электрычнай і цеплавой энэргіі адключаныя 799 спажыўцоў і абмежаваныя 3912, паведаміў прэсавы сакратар прэм’ера. Аднак, сказаў ён, “істотнага паляпшэньня становішча справаў у гэтай галіне не адбылося”.
Таму, падкрэсьліў прэсавы сакратар, сёньня на прэзыдыюме Савміну аб’яўленыя вымовы і заўвагі шэрагу кіраўнікоў міністэрстваў і ведамстваў, а тых, хто асабліва праштрафіўся зьнялі з працы. Акрамя таго, урад забавязаў усе органы дзяржаўнага кіраваньня Беларусі, аблвыканкамы й менскі гарвыканкам разабрацца з усімі даўжнікамі і прыцягнуць да строгай адказнасьці кіраўнікоў усіх прадпрыемстваў, “якія не забясьпечылі поўную й своечасовую аплату за энэргарэсурсы, ажно да вызваленьня іх ад пасады”, - сказаў ён. Асабліва падкрэсьлівалася ў рашэньні прэзыдыюму неабходнасьць захаваньня забавязкаў перад “Газпромам” па аплаце пастаўленага ў сьнежні прыроднага газу грашовымі сродкамі і патрабаваньне захоўваць мінімальныя нарматывы грашовай формы аплаты за энэргарэсурсы, паведаміў прэсавы сакратар.
Як паведамляе БЕЛТА, за невыкананьне ў поўным аб’ёме даручэньня Аляксандра Лукашэнкі і пастановы Савету Міністраў паводле аплаты ў лістападзе 2002 году за спажытыя энэргарэсурсы аб’яўленая вымова першаму намесьніку сельскай гаспадаркі й харчаваньня А.Дазораву, генэральнаму дырэктару канцэрну “Белбіяфарм” В.Драніцы, прэзыдэнту канцэрну “Беллегпрам” Э.Нарышкіну.
За невыкананьне межавых нарматываў па разьліках за прыродны газ, электрычную й цеплавую энэргію аб’яўляецца заўвага міністру жыльлёва-камунальнай гаспадаркі А.Мількоце, міністру архітэктуры й будаўніцтва Г.Курачкіну, прэзыдэнту канцэрну “Белместпрам” М.Поўху, прэзыдэнту канцэрну “Белнафтахім” І.Бамбізе. Меры адказнасьці міністра прамысловасьці А.Харлапы й віцэ-прэзыдэнта канцэрну “Беллеспаперпрам” В.Гаўрыловіча будуць вызначаныя па выхаду іх пасьля хваробы.