Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
У сваім выступе напярэдадні Міжнароднага дня правоў чалавека прэзыдэнт Злучаных Штатаў Амэрыкі Джордж Буш згадаў Беларусь разам з такімі антыдэмакратычнымі краінамі як Зімбабвэ, Іран, Куба й Паўночная Карэя. “Мы будзем стаяць плячо да пляча зь людзьмі ўсяго сьвету, якія змагаюцца за асноўныя свабоды, з дэмакратычнымі актывістамі Кубы, студэнтамі ўнівэрсытэтаў Ірану, апазыцыйнымі лідэрамі Зімбабвэ, журналістамі Беларусі ці народам Паўночнай Карэі, якія ніколі ня ведалі, што такое свабода”, -- заявіў Джордж Буш у сваім звароце. Чытайце поўны тэкст звароту прэзыдэнта ЗША цалкам.
Свой погляд на надыходзячыя ў Беларусі выбары ў мясцовыя Саветы выказаў кіраўнік місіі АБСЭ па назіраньні за выбарамі ў Босьніі-Герцагавіне, Малдове, Чарнагорыі, Сэрбіі, Харватыі, Украіне ў 1996-1998 гадах, сябра Нарвэскага Гэльсынскага камітэту Карэ Валан. Ён выступіў з дакладам “Міжнародныя стандарты выбараў і беларускае выбарчае заканадаўства. Навукова-прававы аналіз”.
Праваабарончы цэнтар “Вясна” “рашуча пратэстуе” ў сувязі з грубым ігнараваньнем прынцыпу дэмакратычнасьці пры фармаваньні тэрытарыяльных камісіяў на выбарах у мясцовыя Саветы дэпутатаў. Як гаворыцца ў заяве цэнтру “Вясна”, адмаўленьне ўключыць у склад тэрытарыяльных камісіяў, якія атрымалі прадстаўнікі дэмакратычных партыяў і няўрадавых аб’яднаньняў, сьведчаць пра грубае парушэньне ўладамі патрабаваньняў выбарчага кодэксу. Як паведамляе БелаПАН, размова ідзе, у прыватнасьці, аб артыкуле 35 кодэксу, які дае палітычным партыям й грамадзкім аб’яднаньням права вылучаць сваіх прадстаўнікоў у адпаведныя тэрытарыяльныя структуры.
У Нікарагуа арыштаваны былы прэзыдэнт краіны Арнольда Алеман па абвінавачваньні ў карупцыі й крадзяжы дзяржаўных сродкаў на суму 100 мільёнаў даляраў, паведамляе Радыё Свабода. Як паведамляе AP, следзтва ўстанавіла, што ў пэрыяд прэзыдэнцкага кіраваньня Алеман перавёў гэтыя грошы на свае рахункі банку Панамы. Сьцьвярджаецца, што гэтыя грошы ішлі на фінансаваньне перадвыбарчай кампаніі кандыдатаў ад яго партыі.
Галоўны рэдактар газэты “Рабочы” Віктар Івашкевіч, асуджаны судом да 2 гадоў абмежаваньня волі за публікацыю артыкула “Злачынца павінен сядзець у турме”, які, на думку суда, “абылгаў” Аляксандра Лукашэнку, у панядзелак, 16 сьнежня, адпраўляецца на “хімію” ў Баранавічы. Зьяжджаць зь Менску Івашкевіч будзе а 12.00 з Управы БНФ (вул.Варвашэні,8). Нагадаем, што рэдактару газэты “Рабочы” так і не аб’явілі амністыю й журналіст павінен адпрацаваць на “хіміі” ажно два гады.
Ініцыятарам акцыі ў Бэрне стала аддзяленьне праваабарончай арганізацыі Міжнародная Амністыя Бернскага ўнівэрсітэту. У шэсьці прынялі ўдзел больш за сто чалавек. Большасьць зь іх – студэнты мясцовага ўнівэрсытэту. З плякатамі й сьвечкамі ў руках яны прайшлі па вуліцах швайцарскай сталіцы да беларускай амбасады. Усе ўдзельнікі шэсьця былі з завязаным ротам. Такім чынам праваабаронцы выказвалі пратэст супраць парушэньня правоў чалавека. Па дарозе яны раздавалі мінакам улёткі з інфармацыяй пра ЗУБРа, а таксама аб парушэньнях правоў чалавека ў Беларусі.
Такім чынам, Чэхія на працягу апошніх тыдняў выразна акрэсьліла сваё стаўленьне да Беларусі і паказала, каго тут не чакаюць, а каго – рады вітаць. Летась у верасьні прэзыдэнт Чэхіі прымаў Васіля Быкава ў Праскім градзе. Цяпер Вацлаў Гавал адзначае, што “даць Васілю Быкаву і ягонай жонцы магчымасьць жыць у Чэхіі – гэта ня толькі наш абавязак, гэта вялікі гонар для дзяржавы”. Ад сёньня Васіль Быкаў будзе стала жыць у Чэскай Рэспубліцы. Пісьменьніку і ягонай жонцы прадастаўлены бестэрміновы від на жыхарства.
Сусьветная асацыяцыя газэт і сусьветны форум рэдактараў зьвярнуліся да Аляксандра Лукашэнкі з просьбай спыніць кампанію, накіраваную на “ўціск крытычных галасоў”, і даць магчымасьць прэсе дзейнічаць без умяшальніцтва з боку дзяржавы. У лісьце, накіраваным на імя Аляксандра Лукашэнкі, Сусьветная асацыяцыя газэт і Сусьветны форум рэдактараў выказалі сур’ёзную заляпочанасьць закрыцьцём незалежных газэт і прысудамі адносна журналістаў, а таксама заявілі, што вышэйзгаданыя дзеяньні зьяўляюцца “відавочным парушэньнем свабоды выяўленьня”.
Намесьнік міністра абароны Беларусі Ўладзімер Усхопчык, якога ў Літве лічаць вайсковым злачынцам, прызначаны кіраўніком рабочай групы ў справе арганізацыі выбараў у войску. Вельмі нэгатыўным фактам для дэмакратызацыі Беларусі й для падрыхтоўкі да мясцовых выбараў назваў гэтае рашэньне дакладчык па Беларусі ў Парлямэнцкай асамблеі Рады Эўропы, дэпутат літоўскага Сэйму Вацлаў Станкевіч. “Беларусь мае магчымасьць праз гэтыя мясцовыя выбары паказаць усяму сьвету, што ўсё ж ідзе дэмакратычным шляхам. Але, калі будуць на такіх пасадах, як кіраўнік гэтай групы, такія асобы, як генэрал Усхопчык, з гэтага нічога добрага ня будзе. Пачатак ня вельмі добры. Супольнасьць Эўропы прыме гэтае вельмі нэгатыўна. Пра Ўсхопчыка ведаюць ня толькі ў Літве, ведаюць ужо й у Эўропе. Таму паўтаруся, гэта вельмі нэгатыўны факт для дэмакратызацыі Беларусі й для падрыхтоўкі да будучых выбараў”, - заявіў Станкевіч Радыё Свабода.
Нарвэгія ўвяла з учорашняга дня забарону на ўезд у краіну Аляксандра Лукашэнкі й прадстаўнікоў вышэйшага беларускага кіраўніцтва. Нарвэскія ўлады падтрымалі пазыцыю 14 краінаў Эўразьвязу й ЗША, якія ўвялі забарону ў лістападзе і тым самым выказалі пратэст супраць парушэньняў правоў чалавека ў Беларусі. Нарвэгія не зьяўляецца сябрам ЭЗ.
“Я спадзяюся, што беларускі бок і АБСЭ хутка прыйдуць да ўзаемапрымальнага пагадненьня, якое б дазволіла АБСЭ адкрыць у студзені прадстаўніцтва ў Беларусі”. Такую заяву зрабіў генэральны сакратар Арганізацыі па бясьпецы й супрацоўніцтву ў Эўропе Ян Кубіш, выступаючы перад Радай міністраў Рады Эўропы 11 сьнежня ў Стразбургу. Ён таксама нагадаў, што перамовы па мандату новай місіі АБСЭ ў Беларусі пачаліся на гэтым тыдні ў Вене (Аўстрыя).
Аляксандар Лукашэнка ня лічыць царкву “организацией, которая противоречит принципам государства”. “Я никогда не отделял церковь от решения государственных вопросов, а наоборот отмечал, что наша церковь в последнее время является активнейшим участником тех преобразований, которые происходят в нашем государстве”, -- адзначыў Лукашэнка, сустракаючыся ў чацьвер з чальцамі Сіноду Беларускай праваслаўнай царквы (БПЦ). Паводле беларускага кіраўніка, “наша церковь - частичка нашего народа, нашего Отечества и, если хотите, в своей деятельности она является частичкой нашего государства”.
Далейшы лёс былога амбасадара Беларусі ў Японіі Пятра Краўчанкі будзе вызначацца не ў МЗС, а на больш высокім узроўні. Пра гэта ў чацьвер паведаміў журналістам намесьнік начальніка ўпраўленьня інфармацыі замежнапалітычнага ведамства Андрэй Савіных.
11 сьнежня 2002 году адбылася сустрэча амбасадара Рэспублікі Беларусь у Лібіі Аляксандра Дзеравяшкі з прэзыдэнтам Саюзу гандлёва-прамысловых і сельскагаспадарчых палат Лібіі Абдурахманам Шатэрам. Як паведаміў на брыфінгу намесьнік начальніка ўпраўленьня інфармацыі МЗС Беларусі Андрэй Савіных, у часе сустрэчы бакі абменяліся думкамі аб стане й пэрспэктывах разьвіцьця двухбаковага гандлёва-эканамічнага супрацоўніцтва, асноўных шляхах рэалізацыі Пратаколу аб супрацоўніцтве паміж Беларускай гандлёва-прамысловай палатай і Саюзам гандлёва-прамысловых й сельскагаспадарчых палат Лібіі.
У рамках рэалізацыі дамоўленасьцяў, дасягнутых у часе 5-паседжаньня Беларуска-Іранскай зьмешанай камісіі па пытаньнях гандлёва-эканамічнага супрацоўніцтва, амбасадай Беларусі ў Іране, сумесна з амбасадай Ірану ў рэспубліцы Беларусь й міністэрствам гандлю Ірану наладжаны візыт у г.Менск групы іранскіх бізнэсоўцаў. Пра гэта паведаміў на брыфінгу намесьнік начальніка ўпраўленьня інфармацыі МЗС Беларусі Андрэй Савіных.
Аляксандар Лукашэнка павіншаваў прэзыдэнта Туркмэністану Сапармурата Ніязава зь дзяржаўным сьвятам – Днём нэйтралітэту. Беларускі лідэр задаволена адзначыў, што “политика нейтралитета, проводимая Туркменистаном с 1995 года, получила признание международного сообщества”. Аляксандар Лукашэнка пажадаў Сапармурату Ніязаву посьпехаў у дзяржаўнай дзейнасьці, а туркмэнскаму народу – міру й дабрабыту.
12 сьнежня судовая калегія абласнога суда пад старшынствам судзьдзі Валянціны Буевай агучыла прысуд адносна групы скінхэдаў, якая дзейнічала ў вобласьці з 2001 году. Абвінавачаныя асуджаныя да розных тэрмінаў пазбаўленьня волі, ад 3,5 гадоў да 6 гадоў.
Сусьветны банк прагназуе ў 2003 годзе пагаршэньне стану эканомікі Беларусі. Пра гэта заявіў у пятніцу на міжнароднай канфэрэнцыі “Магчымасьці падтрымкі эканамічнага разьвіцьця Беларусі” дырэктар СБ па Беларусі, Малдове і Ўкраіне Люка Барбанэ.
Аляксандар Лукашэнка ў пятніцу прыняў з дакладам старшыню Камітэту дзяржкантролю Анатоля Тозіка. Як паведамілі "Интерфаксу" ў прэсавай службе кіраўніка дзяржавы, Тозік даў справаздачу аб выніках працы дзяржкамісіі па спыненьні злоўжываньняў у цэлюлозава-папяровай прамысловасьці, створанай распараджэньнем Лукашэнкі 5 кастрычніка 2002 году. За гэты пэрыяд зь ініцыятывы й даручэньня камісіі праведзеныя праверкі 10 прадпрыемстваў цэлюлозава-папяровай прамысловасьці і больш за 80 камэрцыйных структур, якія ажыцьцяўляюць пастаўку сыравіны на прадпрыемствы галіны й збыт гатовай прадукцыі. Распачата й расьследуюцца 15 крымінальных справаў па фактах злоўжываньняў у гэтай галіне. Зьвернута ў даход дзяржавы больш за 1 мільярд рублёў. Дадаткова апісана й арыштавана маёмасьці на суму 325 мільярдаў рублёў.
На 20 мільёнаў рублёў “натэлефанавалі” з пачатку году гарадзенскія міліцыянты з службовых тэлефонаў да абанентаў сотавай сувязі. Кампэнсаваць гэтую суму з уласных заробкаў супрацоўнікам загадаў начальнік Гарадзенскага абласнога ўпраўленьня ўнутраных справаў Уладзімер Белашэўскі.
У лістападзе ў Беларусі зафіксаваны самы высокі за апошнія дзевяць месяцаў узровень інфляцыі -- 3,2 адсоткі. Сёлета гэты паказчык быў вышэй у студзені (6,1 адсоткі) і лютым (3,6). У сакавіку спажывецкія кошты павялічыліся на 2,6 адсоткі, у красавіку - на 2,9, у траўні - на 2,2, у чэрвені - на 1,4, у ліпені - на 1,2, у жніўні - на 1,1, у верасьні - на 1,2, у кастрычніку - на 1,7.
, iнформэр
