У сталіцы Швайцарыі прайшло шэсьце ў падтрымку ЗУБРа :: Хартыя'97 :: Навiны

Ініцыятарам акцыі ў Бэрне стала аддзяленьне праваабарончай арганізацыі Міжнародная Амністыя Бернскага ўнівэрсітэту. У шэсьці прынялі ўдзел больш за сто чалавек. Большасьць зь іх – студэнты мясцовага ўнівэрсытэту. З плякатамі й сьвечкамі ў руках яны прайшлі па вуліцах швайцарскай сталіцы да беларускай амбасады. Усе ўдзельнікі шэсьця былі з завязаным ротам. Такім чынам праваабаронцы выказвалі пратэст супраць парушэньня правоў чалавека. Па дарозе яны раздавалі мінакам улёткі з інфармацыяй пра ЗУБРа, а таксама аб парушэньнях правоў чалавека ў Беларусі.

У апошняй кропцы машруту -- ля амбасады Беларусі ў Швайцарыі ўсе ўдзельнікі акцыі зьнялі павязкі, якія закрывалі іх рот, і павесілі іх на агароджу беларускага прадстаўніцтва. Ля ўваходу ў амбасаду актывісты Міжнароднай Амністыі са сьвечак склалі слова “ЗУБР”. Пасьля некалькіх выступаў зь мегафонам праваабаронцы перадалі петыцыю з патрабаваньнем да беларускіх уладаў спыніць парушэньні правоў чалавека й разышліся.
Паводле адной з арганізатарак акцыі Міколь Мэціс, дзякуючы дзейнасьці мясцовага аддзяленьня Міжнароднай Амністыі й публікацыям у СМІ, студэнты Бернскага ўнівэрсітэту, а таксама многія жыхары сталіцы Швайцарыі занепакоеныя парушэньнямі правоў чалавека ў Беларусі. Многія ведаюць аб дзейнасьці руху ЗУБР.