ЭЗ хацеў бы ўмацаваць свае адносіны зь Беларусьсю :: Хартыя'97 :: Навiны

Эўразьвяз хацеў бы ўмацаваць свае адносіны зь Беларусьсю, Украінай і Малдоваю. Пра гэта заявіў прэм’ер-міністар Даніі, які старшынюе зараз у Эўразьвязе, Андрэс Фог Расмусэн, закрываючы саміт ЭЗ ў Капенгагене 13 сьнежня. Але, як паведамляе БелаПАН, гэтыя адносіны павінны быць заснаваныя на “доўгатэрміновым зьбліжэньні й садзейнічаньні дэмакратычным і эканамічным рэформам, устойліваму разьвіцьцю й гандлю”. З гэтай мэтай ЭЗ распрацоўвае “новыя ініцыятывы”, паведаміў Расмусэн. Таксама ён адзначыў, што пашырэньне ЭЗ “умацоўвае адносіны” з Расеяй.

Нагадаем, што на саміце Эўразьвязу ў Капенгагене запрашэньне ўступіць у ЭЗ атрымалі 10 краінаў Міжмор’я, Цэнтральнай Эўропы й Прыбалтыкі - Венгрыя, Кіпр, Латвія, Літва, Мальта, Польшча, Славакія, Славенія, Чэхія і Эстонія.
“Пашырэньне ЭЗ будзе спрыяць дынаміцы эўрапейскай інтэграцыі”, -- заявіў Расмусэн. Гэта, паводле ягоных словаў, дае “неабходную магчымасьць пашырэньня адносінаў”, заснаваных на агульных палітычных і эканамічных каштоўнасьцяў, з краінамі-суседзямі ЭЗ.
Рада міністраў ЭЗ, паводле прэм’ер-міністра Даніі, “падтрымлівае далейшае разьвіцьцё трансмежавага й рэгіянальнага супрацоўніцтва, у прыватнасьці, праз узмацненьне транспартнай інфраструктуры”, з краінамі-суседзямі ЭЗ і між імі.