МВФ: Беларусі неабходна рашуча рухацца па шляху рынкавых рэформаў :: Хартыя'97 :: Навiны

Для Беларусі прыйшоў час рашуча рухацца па шляху рынкавых рэформаў. Пры гэтым неабходна выкарыстоўваць высокакваліфікаваную працоўную сілу, стратэгічна выгаднае становішча для транзітнага гандлю й лёккай прамысловасьці, таксама нізкі ўзровень вонкавага доўгу. Такую думку выказала прадстаўнік Міжнароднага валютнага фонду (МВФ) у Беларусі Зузана Брыксіова, выступаючы 14 сьнежня ў Менску на міжнароднай канфэрэнцыі “Магчымасьці падтрымкі эканамічнага разьвіцьця Беларусі”.

Як паведамляе БелаПАН, сп-ня Брыксіова адзначыла, што Беларусь значна адстае ад іншых краінаў рэгіёну па ўзроўні разьвіцьця структурных рэформаў. “Беларускай эканоміцы не хапае гнуткасьці і інвэстыцыяў”, -- сказала прадстаўнік МВФ. – Да таго ж , у Беларусі склаліся неспрыяльныя ўмовы для разьвіцьця бізнэсу й прыватнага сэктару эканомікі.”
“Беларусі неабходна імкнуцца да ўсталяваньня большай макраэканамічнай стабільнасьці, паляпшэньня ўмоваў для разьвіцьця бізнэсу, павелічэньня празрыстасьці й эфэктоўнасьці бюджэтнай палітыкі, -- адзначыла Зузана Брыксіова. -- Неабходна таксама ініцыіраваць рэфармаваньне фінансавага сэктару, паслабіць абмежавальны рэжым замежнага гандлю і ўсталяваць большую заканадаўчую стабільнасьць”.
“Рынкава арыентаваныя рэформы, якія праводзяцца сумесна з узгадненьнем заканадаўства й палітыкі Беларусі й Расеі могуць дапамагчы Беларусі пераадолець ізаляцыю”,-- лічыць прадстаўнік МВФ у Беларусі.