Міністэрства гандлю Ірану актывізуе кантакты зь Беларусьсю :: Хартыя'97 :: Навiны

З 16 па 22 сьнежня ў Беларусі знаходзіцца іранская дэлегацыя. У візыце, наладжаным пры падтрымцы амбасады Ірану ў Беларусі і амбасады Беларусі ў Іране, удзельнічаюць спэцыялісты з Цэнтру разьвіцьця экспарту Ірану, а таксама кіраўнікі шэрагу кампаніяў й прадстаўнікі банкаў.

Відавочна, што міністэрства гандлю Ірану актывізуе кантакты зь Беларусьсю. Візыт праходзіць хутка пасьля выставы іранскіх тавараў у Менску. Верагодна, іранскі бок не задавальняе сальда гандлёвага балянсу зь Беларусьсю. З 15,2 млн. даляраў узаемнага таваразвароту за 10 месяцаў сёлетняга году на долю іранскага экспарту прыпадае ўсяго 609 тыс. даляраў.
У кастрычніку сёлетняга году на паседжаньні беларуска-іранскай зьмешанай камісіі па гандлёва-эканамічным супрацоўніцтве закраналіся пытаньні павелічэньня таваразвароту. Цяперашні візыт – крок да яго рэальнага росту. Прадпрымальнікі Ірану прыяжджаюць з канкрэтнай мэтай: для знаёмства з будаўнічым сэктарам нашай эканомікі, а некаторыя будуць прымаць удзел у беларускай выставе, наладжанай гэтымі днямі выставачнай кампаніяй “Экспафорум”. Як сказаў карэспандэнту “БДГ” намесьнік амбасадара Ірану ў Беларусі Махмуд Мазафары, “іранцы правядуць шэраг сустрэч зь беларускімі партнёрамі з мэтай пашырэньня дзелавога супрацоўніцтва”. Акрамя таго, будзе абмяркоўвацца пытаньне адкрыцьця ў Менску іранскага гандлёвага дому, а магчыма, адбудзецца агляд памяшканьня для яго.