Удзельнікі пікету ў Пінску арыштаваныя на 10 сутак :: Хартыя'97 :: Навiны

Судом Пінску й Пінскага раёну (Берасьцеская вобласьць) два жыхары гораду – Ігар Сараковік і Лявонці Вабішчэвіч асуджаныя да 10 сутак арышту. Такое пакараньне ім вызначана за парушэньне вызначаных Пінскім гарвыканкамам умоваў правядзеньня пікету.

Сараковік і Вабішчэвіч зьяўляюцца сябрамі Кансэрватыўна-Хрысьціянскай партыі БНФ. Яны сталі арганізатарамі пікету, які прайшоў 26 лістапада ў Пінску, за спыненьне вайны ў Чачэніі.
Разглядаючы заяўку на пікет, гарадзкія ўлады ўказалі дакладнае месца яго правядзеньня – на тратуары ў скверы па вуліцы Пушкіна насупраць фасаду будынка ААТ “Пінсксаўгасбуд” па ўсім яго пэрымэтры. У пісьмовай форме гарвыканкам абавязаў міліцыю аформіць магчымае адхіленьне ад вызначаных межаў.
Як паведамілі БелаПАН у перапынках між судовымі паседжаньнямі Вабішчэвіч і Сараковік, яны адыйшлі ад скрайняй кропкі дазволенага месца правядзеньня пікету ўсяго на пяць мэтраў і гэта, на іх думку, ня можа стаць прычынай для прыцягненьня да адміністратыўнай адказнасьці. Аднак судзьдзя палічыла гэта за парушэньне. Як арганізатарам акцыі, Вабішчэвічу й Сараковіку пагражала ад 10 да 15 сутак арышту або грашовы штраф да 150 мінімальных заробкаў. Судзьдзя Раіса Лабачэўская прапанавала ім выбар – арышт ці штраф.
Пасьля заявы адказчыкаў аб адсутнасьці ў іх такіх вялізных сумаў, суд прыняў рашэньне аб адміністратыўным арышце і вызначыў па 10 сутак кожнаму з арганізатараў пікету.