Лукашэнка крытыкуе федэрацыю футбола :: Хартыя'97 :: Навiны

Беларускае кіраўніцтва не зьбіраецца мірыцца зь цяперашнім становішчам справаў у футболе, і робіць усё неабходнае для таго, каб вывесьці гэты ўсенародна любімы від спорту на годны ўзровень. Пра гэта заявіў Аляксандар Лукашэнка, які таксама зьяўляецца і прэзыдэнтам Нацыянальнага Алімпійскага камітэту, выступаючы ўчора на справаздачна-выбарчай канфэрэнцыі Беларускай федэрацыі футболу. Ён раскрытыкаваў сытуацыю ў БФФ і з жалем адзначыў, што Беларусь знаходзіцца на задворках эўрапейскага й сусьветнага футболу і гэта негатыўна ўплывае на імідж краіны, псыхалягічны стан й настрой гульцоў. Аляксандар Лукашэнка лічыць, што ў краіне ня створаная сыстэма функцыянаваньня нацыянальных камандаў, да гэтага часу няма добра прадуманай і пралічанай доўгатэрміновай Праграмы разьвіцьця нацыянальнага футболу.

“Хотелось бы, чтобы отечественный футбол смелее и увереннее занимал достойное место на мировой и европейской арене”, -- адзначыў ён. У беларускага футбола, лічыць Аляксандар Лукашэнка, ёсьць усе магчымасьці для таго, каб дасягнуць эўрапейскага ўзроўню: матэрыяльная база, кадравы патэнцыял і ўзровень майстэрства спартоўцаў. Лукашэнка адзначыў, што дзяржава будзе і надалаей аказваць падтрымку разьвіцьцю беларускага футбола, але пры наяўнасьці канкрэтных вынікаў.
Канфэрэнцыя завяршылася позна ўвечары, аднак было прынятае рашэньне перанесьці выбары старшыні БФФ. Як паведамляе ИТАР-ТАСС, у ліку сямі прэтэндэнтаў на гэтую пасаду найбольш верагоднымі называюць кандыдатуры дзейнага старшыні федэрацыі Рыгора Фёдарава і дзяржаўнага сакратара Савету бясьпекі Беларусі Генадзя Нявыгласа.