“Падарунак” да Новага Году ад Мінэканомікі :: Хартыя'97 :: Навiны

Пастановаю Міністэрства эканомікі Рэспублікі Беларусь ад 13.12.2002 № 268 аблвыканкамам і Менскім гарвыканкамам узгодненае падвышэньне тарыфаў на камунальныя паслугі для насельніцтва з 20 сьнежня 2002 году. Як паведамілі ў прэсавай службе Мінэканомікі, тарыфы на паслугі па ацяпленьні і гарачым водазабесьпячэньні будуць падвышаныя ня больш чым у 1,25 разы, а на паслугі халоднага водазабесьпячэньня і каналізацыі – ня больш чым у 1,5 разы.

Квартплата ў Беларусі даражэе хутчэй, чым у іншых краінах СНД. Усяго за 10 месяцаў сёлетняга году электраэнэргія падаражэла для гарадзкога насельніцтва ў 2,5 разы. Для сельскага – больш чым у 3 разы. Газ для насельніцтва з пачатку году падаражэў у 3 разы.
Нагадаем, з пачатку году (да сёньняшняга падаражэньня) квартплата ў Беларусі павялічылася ў 5,64 разы. Ацяпленьне падаражэла ў 2,43 разы, гарачая вада – у 2,42.
У цяперашні ацяпляльны пэрыяд (без уліку апошняга падаражэньня за стандартную аднапакаёвую кватэру, дзе пражывае два чалавекі, трэба было плаціць 30 тысячаў рублёў, стандартную двухпакаёвую (3 чалавекі) – 40 тысячаў, а стандартную трохпакаёвую (4 чалавекі) – 60 тысяч рублёў. І гэта пры тым, што сярэдні заробак беларусаў не дацягвае нават да абацаных 100 даляраў.
Летась мы плацілі 20% ад рэальнага кошту камунальных паслуг, сёлета працэнт аплаты дасягнуў ужо 40%. У наступным годзе тарыфы зноў павінны падняцца -- улады абяцаюць, што мы будзем аплочваць 100% ад рэальнага кошту камунальных выдаткаў.