Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
“У сувязі зь відавочна тэндэнцыйнымі паведамленьнямі некаторых расейскіх СМІ, у прыватнасьці, газэты “Известия”, з выпадку майго пераезду ў Прагу хачу заявіць, што я не прасіў у чэскага ўраду або прэзыдэнта Вацлава Гавэла палітычнага прытулку і ня меў намеру атрымаць такі. Мая просьба заключалася ў прадастаўленьні мне і маёй жонцы права на больш-менш працяглае пражываньне ў Чэхіі, неабходнае для літаратурнай працы і лячэньня як хроніку-лёгачніку. Такое права я і атрымаў у сьнежні 2002 году, сапраўды, пры садзеяньні прэзыдэнта Чэскай Рэспублікі. Спроба некаторых СМІ ператварыць гэты факт, увогуле звычайны для цеперашніх часоў, у палітычную акцыю ёсьць, на мой погляд, зусім правакацыйнай і вартай асуджэньня. Васіль Быкаў, грамадзянін Рэспублікі Беларусь”, - такая заява народнага пісьменьніка Беларусі Васіля Быкава была распаўсюджаная сёньня Беларускім цэнтрам у Празе.
Вынікі 2002 году падсумаваў моладзевы рух супраціву ЗУБР. Актывісты руху вынесьлі на суд грамадзкасьці своеасаблівую справаздачу аб сваёй дзейнасьці за сёлетні год. У справаздачы зубры распавядаюць, што, на іх погляд, зьяўляецца “акцыяй году”, “лёзунгам году”, “салідарнасьцю году”, “прысудам году”, “выклікам году”, “праблемай году”, “няўдачай году”, “надзеяй году” і г.д.
“Нават адсюль, з Асіповіцкай “хіміі”, добра відаць, што ў апошняга дыктатара Эўропы застаўся апошні рэсурс, які дазваляе Лукашэнку яшчэ трымацца на плаву. І гэты рэсурс – страх. Той самы страх, які бярэ свой пачатак пад курапацкімі соснамі і ў сталінскім ГУЛАГу. Той самы страх, які паралізуе ў нацыі волю да разьвіцьця, прымушае людзей выконваць злачынныя амаральныя загады, дазваляе мірыцца зь несправядлівасьцю і галечай, якія штодзённа параджае сёньняшні рэжым...Жадаю беларусам у наступным годзе пазбавіцца ад гэтага страху. Каб нашае вечнае імкненьне “людзьмі звацца” ажыцьцявілася – быць гэтымі людзьмі! Вясёлых Калядаў і шчасьлівага Новага году! Няхай любоў, дабрабыт і здароўе будуць нязьменнымі сябрамі кожнага з вас. За Вашу й нашу ПАГОНЮ! За Вашу й нашу СВАБОДУ!”, -- з такім вінашаваньнем зьвярнуўся да беларускага народа галоўны рэдактар газэты “Пагоня” Мікола Маркевіч, асуджаны за крытыку ў адрас Аляксандра Лукашэнкі да 1,5 гады абмежаваньня волі.
Перад выбарамі Крэмль здолее адцягнуць новы жнівеньскі калябс. Але ненадоўга
Улады доўга не хацелі прызнаваць, што эканоміка ідзе пад схіл. У канцы мінулага тыдня ім давялося такі выціснуць зь сябе, што адзін з галоўных парамэтраў правалены. Першы намесьнік старшыні кіраваньня Цэнтрбанку Алег Вьюгін паведаміў, што інфляцыя па выніках году пераўзыдзе 15%.
Прадстаўнікі амэрыканскае й братанскае выведак уважліва назіраюць за паводзінамі прэзыдэнта Іраку Садама Гусэйна у той час, як апошні публічна абдымаецца з інспэктарамі ААН, паддобрываецца да эўрапейцаў і заклікае арабскі сьвет аб’яднанцца перад абліччам амэрыканскае ваеннае пагрозы.
Сёньня, 27 сьнежня а 14.00 у судзе Цэнтральнага раёну г.Менску адбудзецца судовы працэс па зыску Анатоля Лябедзькі да КДБ Беларусі. Лідэр Аб’яднанай грамадзянскай партыі намерваецца ў судовым парадку аспрэчыць афіцыйнае папярэджаньне, вынесенае яму 5 лістапада сёлетняга году.
Праверка дзейнасьці кіраўніка Сьледчага камітэту МУС Леаніда Глухоўскага завершаная, аднак ён пакуль не прыступаў да выкананьня сваіх абавязкаў. Пра гэта сёньня паведаміў журналістам міністар ўнутраных справаў Уладзімер Навумаў.
Міністар унутраных справаў Беларусі Ўладзімер Навумаў супраць таго, каб беларускія сьледчыя карысталіся паслугамі замежных спэцыялістаў у пошуках зьніклых апазыцыянэраў, як таго патрабуюць сваякі зьніклых. Міністар спасылаецца на эўрапейскі досьвед расьсьледаваньня такіх справаў і на неабходнасьць захаваньня пэўных таямніц.
Сёлета пры неспарэдным удзеле непаўнагадовых было зьдзейсьнена на 10 адсоткаў болей ад агульнай колькасьці злачынстваў. У выніку прынятых мераў на ўлік пастаўлена каля 16 тысячаў падлеткаў, 3,5 тысячы нешчасьлівых сем’яў, звыш 4 тысячаў чалавек пазбаўленыя бацькоўскіх правоў.
У 2002 годзе ў краіне зарэгістравана каля 130 тысячаў злачынстваў, і гэта на 18% болей, чым у 2001 годзе, заявіў у чацьвер на прэсавай канфэрэнцыі ў Менску міністар унутраных справаў Беларусі генэрал-маёр Уладзімер Навумаў. У сфэры эканомікі, паводле дадзеных МУС, сёлета ў Беларусі міліцыя раскрыла больш за 18 тысячаў злачынстваў. Распачата больш за 5,5 тысячаў крымінальных справаў аб фактах крадзяжу й растраты маёмасьці, зарэгістравана 2,4 тысячаў фактаў фальшаваньня грошай, каля 1,2 тысячаў выпадкаў хабарніцтва.
Рэспбліка Беларусь мае “палітычны і маральны інтарэс” у пытаньні атрыманьня расейскіх крэдытаў, заявіў на прэсавай канфэрэнцыі ў Менску журналістам намесьнік старшыні кіраваньня Нацыянальнага банку Беларусі Мікалай Лузгін.
Кіраваньне па справах апарату прэзыдэнта Туркмэніі падпіша кантракт з вытворчым аб’яднаньнем “Менскі трактарны завод” (Беларусь) на пастаўку трактараў МТЗ-80Х-1 і запасных частак да іх. Крыніца ў асацыяцыі “Туркмэнабахызмат” (Туркмэнсельгасабслугоўваньне), якая зьяўляецца атрымальнікам тэхнікі, паведаміў “Союз-инфо”, што агульная сума кантракту на пастаўку да 1 сакавіка 2003 году 500 трактараў складзе $6 млн.
, iнформэр
