Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Каардынатару ЗУБРа адмовілі ў датэрміновым вызваленьні 16:37, 08/01/2003, ЗУБР
Сёньня аднаму з каардынатараў руху ЗУБР Аляксею Шыдлоўскаму стала вядома, што суд Цэнтральнага раёну адмовіў яму ў датэрміновым вызваленьні ад папраўчых прац.
Летам 2001 году судом Партызанскага раёну гораду Менску па абвінавачваньні ў псаваньні дзяржаўнай маёмасьці Аляксей Шыдлоўскі быў асуджаны да двух гадоў папраўчых прац. Суд палічыў, што менавіта пад гэты артыкул падпадае нанясеньне палітычных графіці. Вырак уступіў у сілу ў лістападзе 2001 году. З таго часу кожны месяц на карысьць дзяржавы ў Шыдлоўскага вылічваецца 20% заробку. Пасьля сканчэньня тэрміну пакараньня інспэкцыя па папраўчых працах падала ў суд Цэнтральнага раёну Менску дакумэнты на вызваленьне Шыдлоўскага ад пакараньня.
Нягледзячы на адсутнасьць парушэньняў закону з моманту вынясення прысуду, станоўчыя характарыстыкі зь месца працы і забавязак калектыву газэты “Наша ніва”, дзе працуе Шыдлоўскі, узяць яго пад апеку, зубру адмовілі ў вызваленьні без тлумачэньня прычынаў. Акрамя гэтага суд пазбавіў Шыдлоўскага права надалей зьвяртацца ў судовыя органы з такой просьбай. “Суд ня меў ніякіх падставаў адмаўляць мне ў датэрміновым вызваленьні. Фактычна гэта фармальная працэдура. З колькасьці больш чым 15 чалавек, чые дакумэнты падаваліся разам з маімі, я стаў адзіным, каму адмовілі. Рашэньню суда зьдзівіліся нават у інспэкцыі па папраўчых працах, але сказалі, што я павінен разумець, з чым зьвязана адмова. Натуральна, пасьля гэтага ў мяне няма сумневаў, што адмаўленьне датэрмінова мне вызваліць ад пакараньня выклікана маёй дзейнасьцю ў руху ЗУБР і, у прыватнасьці, нашай актывізацыяй у апошні час”, - патлумачыў Аляксей Шыдлоўскі.
, iнформэр
