Ганс-Георг Вік: Лукашэнку час прывыкаць да новага палітычнага клімата :: Хартыя'97 :: Навiны

Пэрспэктывы разьвіцьця адносінаў Беларусі з эўрапейскай супольнасьцю ў 2003 годзе не шмат абяцаюць, лічыць былы кіраўнік Кансультатыўна-назіральнае групы АБСЭ ў Беларусі Ганс-Георг Вік. У інтэрвію БелаПАН ён адзначыў, што на дадзены момант адсносіны паміж Беларусьсю і эўрапейскімі інстытутамі “напружаныя”. “Пасьля прэзыдэнцкіх выбараў 2001 году Аляксандар Лукашэнка ініцыяваў жорсткія меры супраць грамадзкіх арганізацыяў, якія падтрымліваюць апазыцыю, а таксама супраць незалежных СМІ, - сказаў Вік. – Тым самым, Лукашэнка ўсё больш і больш адварочвае краіну ад прынцыпаў дэмакратычных трансфармацыйных працэсаў, усталяваных АБСЭ і эўрапейскай супольнасьцю”.

Аднак, як адзначыў былы кіраўнік КНГ АБСЭ ў Беларусі, за апошнія два гады ў краіне ўсё ж такі дасягнуты “некаторы прагрэс у працэсе дэмакратычнай трансфармацыі”. У прыватнасьці, паводле ягоных словаў, палітычныя структуры адасобіліся ад грамадзянскай супольнасьці, створаная сетка незалежных назіральнікаў за выбарамі. Ганс-Георг Вік таксама зьвярнуў увагу на тое, што на дадзены момант адбываюцца значныя перамены, якія змогуць паўплываць на далейшае разьвіцьцё дэмакратыі ў Беларусі. Паводле ягоных словаў, з прыняцьцем праз два гады ў сябры Эўрапейскага зьвязу і НАТО краін Балтыі і Польшчы, Беларусь стане непасрэдным суседам ЭЗ. “Расея, зьвязаная зь Беларусьсю саюзам, пакуль яшчэ невыразнага характару, вельмі блізка падышла да НАТО, і будзе мець цесную сувязь з краінамі Эўрапейскага зьвязу, - сказаў Вік. - Пытаньне ў тым, ці жадае Беларусь заставацца аўтсайдэрам гэтага сусьветнага інтэграцыйнага працэсу, якім яна зьяўляецца зараз і будзе працягваць заставацца, калі і далей ня будзе арыентавацца на эўрапейскія стандарты ў галоўных пытаньнях правоў чалавека, дэмакратыі, вяршынства закону й прынцыпаў рынкавай эканомікі”.
Як лічыць Вік, насельніцтва Беларусі шмат у чым знаходзіцца “спераду прэзыдэнта ў разуменьні пераменаў, якія адбываюцца вакол краіны, і ў сваім поглядзе на будучыню Беларусі”. “У сувязі з тым, што грамадзкая думка – як у Беларусі, так і ў Расеі – зараз на баку ЭЗ і ягоных дэмакратычных каштоўнасьцяў, зразумела, што беларускаму лідэру прыйшоў час прыладкавацца да новага палітычнага клімата ў краіне і адкрыць Беларусь для сапраўднай дэмакратыі, вяршынства закона і павагі правоў чалавека, - сказаў былы кіраўнік місіі АБСЭ ў Менску. – Калі гэта адбудзецца, Беларусь будзе разьвівацца як інтэграваная частка дэмакратычнай Эўропы і як краіна, вольная ад страху”.