Лукашэнка ўзяўся за рыбную гаспадарку :: Хартыя'97 :: Навiны

Аляксандар Лукашэнка раскрытыкаваў дзейнасьць рыбагаспадарчага коплексу краіны. На думку кіраўніка дзяржавы, крыніцы рыбнай прадукцыі ў краіне выкарыстоўваюцца вельмі неэфектыўна. У час сёньняшняй нарады па пытаньнях паляпшэньня забесьпячэньня насельніцтва рыбай і морапрадуктамі кіраўнік дзяржавы зьвярнуў увагу на той факт, што ў параўнаньні з 1990 годам прадуктыўнасьць рыбных гаспадарак Беларусі зьнізілася ў 3,5 разы. У 2002 годзе ў рэспубліцы было ўлоўлена 10 тысячаў тонаў рыбы, што паводле Лукашэнкі, зьяўляецца недастатковым.

Задача ў тым, каб у бліжэйшыя гады выйсьці на аб’ём улову прудавой і азёрна-рачной рыбы ня менш за 20 тысячаў тонаў штогод, падкрэсьліў Лукашэнка.

Паводле кіраўніка дзяржавы, на сёньня 90 адсоткаў спажываемай у Беларусі рыбы складаюць імпартныя пастаўкі. Прэзыдэнт выказаў усхваляванасьць адносна разьвіцьця спэкулятыўных тэндэнцыяў у гэтай сфэры і імкненьні асобных груп зарабіць на здароўі чалавека.

“Обеспечение страны морской рыбой и морепродуктами отдано на откуп рыночной стихии. Сегодня завозом рыбы занимаются сотни импортеров, которые зачастую не имеют надлежащих условий для ее хранения, торговли, а также уклоняются от уплаты налогов. Правительство не только не управляет, но даже элементарно не может воздействовать на протекающие процессы в этом сегменте рынка”, -- падкрэсьліў кіраўнік дзяржавы.

Паводле пэўных дадзеных, у 2002 годзе спажываньне рыбы ў нашай краіне павялічылася ў два разы ў параўнаньні з 1995 годам – з 7 да 14 кіляграмаў у год у сярэднем на душу насельніцтва. Разам з тым, гэтыя паказьнікі ніжэй за рэкамэндаваную мэдычную норму (18,2 кг) таго ўзроўню спажываньня рыбы, які быў у Беларусі ў часы СССР.