Частоты “Маяка” і “Юности” дастануцца “саюзнаму” радыё :: Хартыя'97 :: Навiны

Як паведамілі АБН у прэсавай службе Парлямэнцкага Сходу “саюзнае дзяржавы”, 14 студзеня Рада Парлямэнцкага Сходу даручыла камісіі па інфармацыйнай палітыцы і ўзаемадзеяньню з грамадзкімі аб’яднаньнямі вывучыць праблему спыненьня рэтрансьляцыі праграмаў радыёстанцыяў “Маяк”, “Голас России” і “Юность” у Рэспубліцы Беларусь. У часе вывучэньня складзенай сытуацыі сябры камісіі па інфармацыйнай палітыцы і ўзаемадзеяньню з грамадзкімі аб’яднаньнямі прыйшлі да высновы ў тым, што ў аснове спыненьня вяшчаньня ляжаць не палітычныя, а выключна эканамічныя праблемы.

Як паведаміла “Дзяржаўная радыёвяшчальная кампанія “Маяк”, трансьляцыя праграмаў у Беларусі да нядаўняга часу фінансавалася зь бюджэту РБ (паводле падліка беларускага боку выдаткі складалі 608 тыс. 234,29 дал. у год). У сувязі з недахопам бюджэтных сродкаў Міністэрства сувязі Беларусі прапанавала кампаніі “Маяк” ажыцьцяўляць трансьляцыю за кошт уласных сродкаў. Аднак, у сувязі з адсутнасьцю ў ГРК “Маяк” ліцэнзіі на вяшчаньне за межамі Расейскай Федэрацыі і неабходных фінансавых сродкаў, трансьляцыя на Беларусь спыненая.
У такой сытуацыі камісія па інфармацыйнай палітыцы і ўзаемадзеяньні з грамадзкімі аб’яднаньнямі, нязьменна выступаючы за захаваньне і пашырэньне адзінай інфармацыйнай прасторы “саюзнае дзяржавы”, прапанавала тэлерадыёвяшчальнай арганізацыі “саюзнай дзяржавы” ў бліжэйшы час разгледзіць магчымасьць атрыманьня ліцэнзіі на вяшчаньне на тэрыторыі Беларусі, а таксама захаваньня праграмаў радыёстанцыі “Саюз” (штодзённыя выпускі навінаў, праграма “Расея-Беларусь”, радыёмост “Масква-Менск”), якія раней рэгулярна выходзілі ў этэры “Маяка” і “Юности”, і аплаты паслуг сувязі. “Такім чынам, частоты “Маяка” і “Юности” ў Рэспубліцы Беларусь могуць трапіць да Тэлерадыёвяшчальнай арганізацыі “саюзнай дзяржавы”, -- адзначаецца ў паведамленьні.