“Спадчына” зойме месца РТР ці “Культуры” :: Хартыя'97 :: Навiны

У аўторак намесьнік міністра інфармацыі Беларусі Сяргей Булацкі выступіў з тлумачэньнямі адносна надыходзячай перарэгістрацыі тэле- і радыёстанцыяў, якая павінна быць выкананая да 1 чэрвеня сёлетняга году.

Гэтае рашэньне Савету міністраў не зьвязанае “ні зь якімі ідэялягічнымі аспэктамі”, заявіў Булацкі.
“Перарэгістрацыя – гэта выключна тэхнічны момант, які зьвязаны з тым, што рашэньне аб выдзяленьні вяшчальных частот зараз будзе прымаць Міністэрства інфармацыі”, -- адзначыў Булацкі ў інтэрвію газэце “Звязда”.

Ён падкрэсьліў, што рашэньне аб перарэгістрацыі будзе прымацца пасьля падачы тэле- і радыёстанцыямі творчай канцэпцыі свайго разьвіцьця і тэхніка-эканамічнага абгрунтаваньня. Акрамя таго, паведаміў міністар, рыхтуецца праект пастановы аб праве наземнага этэрнага вяшчаньня на конкурснай аснове.

Паводле дакумэнта, 30-40 адсоткаў вяшчаньня расейскіх радыёстанцыяў, якія рэтрансьлююцца на тэрыторыі Беларусі, павінны аддавацца беларускай музыцы і навінам, або праграмам уласнай вытворчасьці.

Адносна плянаў адкрыцьця новага беларускага тэлеканала “Спадчына” Булацкі патлумачыў, што зараз яшчэ ня вызначана, на якой частаце ён будзе выходзіць. Але ўжо абмяркоўваюцца два варыянты – гэта каналы “Культура” і РТР.