Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Першы намесьнік міністра замежных справаў Беларусі Васіль Пугачоў прыбудзе ў панядзелак, 20 студзеня, ў Бэйрут. Як перадае карэспандэнт РІА "Новости", ён “абмяркуе зь лібанскімі калегамі шляхі пашырэньня і ўмацаваньня беларуска-лібанскіх адносінаў”. На фоне нядаўняга скандалю з атрыманьнем на тэрыторыі Лібану вайсковага абсталяваньня, якое накіроўвалася зь Беларусі ў Ірак, візыт выглядае дастаткова дзіўным.
16 студзеня Аб’яднаная грамадзянская партыя перадала ў амбасаду Расейскай Федэрацыі ў Беларусі два звароты да Прэзыдэнта Расеі Ўладзімера Пуціна, які прыяжджае ў Менск 19 студзеня. Звароты закранаюць дзьве праблемы: нерасьсьледаваньне выкраданьняў апанентаў беларускага рэжыму і парушэньне свабоды слова ў Беларусі. Партыя заклікае прэзыдэнта Расеі ў час ягонага знаходжаньня ў Менску і сустрэч з афіцыйнымі асобамі Беларусі выказаць закляпочанасьць адсутнасьцю прагрэсу ў рашэньні дадзеных праблемаў.
Мясцовая вэртыкаль у асобе старшыні райвыканкаму Станіслава Юргеля патрабуе спыніць дзейнасьць выдаўца газэты Рамуальда Ўлана як індывідуальнага прадпрымальніка і з гэтай мэтай зьвярнулася ў Гарадзенскі абласны гаспадарчы суд. Калектыў газэты перакананы, што такім чынам улады спрабуюць зачыніць папулярнае ў рэгіёне выданьне.
Калектыў тэатру TNT г.Бардо рыхтуецца да пастаноўкі пьесы па мытавах кнігі вядомай беларускай пісьменьніцы Сьвятланы Алексіевіч “Чарнобыльская малітва”. Як паведамляе газэта Liberation рэжысэр-пастаноўшчык тэатру Марк-Энры Буас быў узрушаны пасьля знаёмства з гэтым творам аб страшных падзеях наступстваў катастрофы на Чарнобыльскай АЭС. Аднак, як адзначае Liberation, таленавітая пісьменьніца была вымушаная пакінуць Беларусь, якой “кіруе нехта Лукашэнка, былы старшыня калгасу, абмежаваны прэзыдэнт, які зьдзекуецца над апазыцыяй”.
Вынікі гэтага этапу выбарчай кампаніі стануць вядомыя толькі 17 студзеня. Пра гэта Радыё Свабода паведаміў сакратар Цэнтарвыбаркаму Мікалай Лазавік. Ён тлумачыць затрымку тым, што трэба сабраць і апрацаваць зьвесткі больш як з 6000 участкаў.
Прадстаўнікі Партыі БНФ занесьлі ўладам сваю заяву з пратэстам. Аніводнага з 33 сябраў партыі не ўключылі ва ўчастковыя камісіі па выбарах у гарадзкі Савет. Рада БНФ лічыць, што гэта сьведчыць аб парушэньні выканаўчымі ўладамі Выбарчага кодэксу.
Пракуратура Кіева плянуе больш грунтоўна расьсьледаваць знаходжаньне дырэктара інфармацыйнага агенцтва “Украинские новости” Міхаіла Каламійца ў Беларусі. Пра гэта паведаміў пракурор Кіева Васіль Прысяжнюк. У бліжэйшы час у Беларусь паўторна прыедзе ўкраінская апэратыўна-сьледчая група, якая спрабуе вызначыць магчымыя кантакты Каламійца і прычыну яго прыбыцьця ў Беларусь, і чаму ён пасьля апынуўся ў лесе недалёка ад горада Маладэчна, дзе і было знойдзена ягонае цела.
Камітэт дзяржаўнага кантролю (КДК) у 2002 годзе спагнаў у даход дзяржавы і вярнуў у бюджэт матэрыяльных каштоўнасьцяў на 107,8 млрд. бел. руб. Гэта ў 3,1 разы болей, чым у 2001 годзе.
Жодзінскім міжраённым аддзелам кіраваньня Дэпартамэнту фінансавых расьсьледаваньняў Камітэту дзяржкантролю па Менску і Менскай вобласьці распачатая крымінальная справа адносна намесьніка дырэктара ЗАТ “Лагойскі лікёрагарэлачны завод”. Як стала вядома ў час сьледзтва, кіраўнік з мэтай атрымаць крэдыт падаў у “Беларускі індустрыйны банк” наўмысна ілжывыя дакумэнты. У выніку дзяржаве нанесены ўрон у асабліва буйным памеры на суму 300 тысячаў даляраў ЗША. Крэдыт на дадзены момант не сплочаны.
З пачатку году Гарадзенская абласная тэлевізія пачала трансьляцыю сваіх перадач на канале “Культура”. Як паведаміў прадстаўнікам "Интерфакса" старшыня Гарадзенскага тэлерадыёаб’яднаньня Ўладзімер Перцаў, Гарадзенская ТВ штодня, з паловы на сёмую і да паловы ночы (зь дзённым перапынкам на тры-чатыры гадзіны), будзе трансьляваць відэапрадукцыю ўласнай вытворчасьці з надзеяй атрымаць свайго сталага гледача.
Лібанская газэта “The Daily Star” паведаміла з спасылкай на дзяржаўнага пракурора Лібану Аднана Адума, што затрыманы ў аэрапорце Бэйруту ваенны груз, які накіроўваўся ў Ірак, прыбыў не зь Беларусі, але з Харватыі. Аднак сам пракурор заявіў Радыё Свабода, што такіх камэнтароў газэце не даваў. Ён таксама пацьвердзіў, што груз прыбыў у Бэйрут менавіта зь Беларусі.
Спагнаць дваццаць тысячаў рублёў з СП “Мабільная Лічбавая сувязь” у якасьці кампэнсацыі маральнага ўрону на карысьць Валеры Леванеўскага і шэсьцьдзясят тысячаў у бюджэт дзяржавы (дзяржпошліна) – такі вэрдыкт вынес Суд Ленінскага раёну Горадні 14 студзеня. Так завяршылася першая судовая спрэчка між Валеры Леванеўскім і арганізацыяй Velcom.
Некалькі дзясяткаў працаўнікоў салігорскага прадпрыемства “Купалінка” – найперш жанчыны – пікетавалі прахадную фабрыкі 15 студзеня. Акцыя сталася чарговай ад кастрычніка мінулага году. Працоўныя патрабуюць працы й заробку і пагражаюць дэманстрацыяй перад рэзыдэнцыяй Лукашэнкі.
Больш за 300 рабочых берасьцейскага заводу “Цьветатрон”, паводле загаду адмiнiстрацыi прадпрыемства, вымушаныя на тры месяцы сысьцi ў адпачынак сваiм коштам. Апроч таго, яшчэ 120 чалавек пераведзеныя на скарочаны працоўны рэжым. Такiм чынам, амаль для паловы працоўнага калектыву заводу, новы год распачаўся з iстотнага пагаршэньня ўмоваў працы.
Летась паводзіны дзяржавы на харчовым рынку былі паказальнымі, але не ўзорнымі. Паліць. Пры гэтым нікога не частуе і дыктуе свае парадкі: каму і колькі паліць і якую марку цыгарэт. П’е. Пры гэтым аддае перавагу імпартнаму піву, абмяжоўвае ягоны ўвоз і нічога ня робіць, каб сваё стала лепей. Есьць. З апэтытам, але патрабуе якаснага прадукта і адмаўляецца плаціць паводле рахунка.
Польшча ўжо другі раз у новым годзе ўводзіць абмежаваньні да 200 літраў на ўвоз аўтамабільнага паліва. Абмежаваньні тычыцца транспартных сродкаў, зарэгістраваных у Расеі, Нямеччыне, Венгрыі, Аўстрыі, Швэцыі, Вялікабрытаніі і Ірляндыі.
Бліжэйшым часам пры Аляксандры Лукашэнку плянуецца стварыць інспэктарскі орган, які будзе кантраляваць працэсы, зьвязаныя з аховай прыродных рэсурсаў і запаведнікаў рэспублікі. Праекты адпаведных нарматыўных актаў знаходзяцца на разглядзе ў кіраўніка дзяржавы. Пра гэта паведаміў Аляксандар Лукашэнка на нарадзе аб мерах паляпшэньня забесьпячэньня жыхароў Беларусі рыбай і морапрадуктамі.
Узмацніць залежнасьць памераў заробнай платы кіраўнікоў дзяржаўных прадпрыемстваў ад паказьнікаў прыбытку і рэнтабельнасьці павінна быць вызначана Савмінам пастанова ад 31.12.2002г. №1852 (зарэг.у НРПА 10.01.2003 г. №5/11767). Дакумэнт уносіць зьмены і дапаўненьні ва Ўставу аб умовах аплаты працы кіраўнікоў дзяржаўных арганізацыяў з доляй уласнасьці дзяржавы ў іх маёмасьці.
Летась не атрымалі накіраваньняў на працу 10% выпускнікоў дзённых аддзяленьняў ВНУ і 22% выпускнікоў тэхнікумаў, якія навучаліся за кошт бюджэтных сродкаў.
Да сярэдзіны студзеня да веснавой пасяўной у Беларусі падрыхтавана толькі 60% трактараў. Асабліва павольна прасоўваецца праца ў сельскіх гаспадарках Меншчыны, Гомельшчыны і Віцебшчыны, дзе яшчэ трэба адрамантаваць ад 42 да 45 адсоткаў такой тэхнікі.
, iнформэр
