Кадры для біржы :: Хартыя'97 :: Навiны

Летась не атрымалі накіраваньняў на працу 10% выпускнікоў дзённых аддзяленьняў ВНУ і 22% выпускнікоў тэхнікумаў, якія навучаліся за кошт бюджэтных сродкаў.

Як паведамляе газэта “Белорусский рынок”, на 1 кастрычніка 2002 г. паводле дадзеных дзяржаўнай службы па працаўладкаваньні ў якасьці беспрацоўных было зарэгістравана 3.488 выпускнікоў ВНУ і тэхнікумаў (што на 1.034 чал., ці на 42,1% болей, чым на 1 кастрычніка 2001 г.), зь іх 2.810 жанчын.

У 2002/2003 навучальным годзе ў Беларусі працуюць 58 ВНУ (44 дзяржаўныя і 14 прыватных). У іх навучаецца 320,7 тыс. студэнтаў, у тым ліку ў дзяржаўных - 272,9 тысячы.

У параўнаньні з 2001/2002 навучальным годам колькасьць студэнтаў павялічылася на 19 тыс. (на 6%). У 2002 г. у ВНУ прынята 79,8 тыс. чал., выпушчана - 47,4 тыс.

Падрыхтоўку спэцыяліста з сярэдняй адукацыяй ажыццьяўляюць 150 тэхнікумаў і іншых навучальных установаў - 143 дзяржаўных і 7 прыватных. У іх навучаецца 160,9 тыс. чал., у тым ліку ў дзяржаўных - 153,4 тыс. чал.

У параўнаньні з 2001/2002 навучальным годам колькасьць навучэнцаў павялічылася на 5,6 тыс. (на 3,6%). У 2002 г. у тэхнікумы прынята 57,1 тыс. чалавек, выпушчана - 46,3 тысячы.

За кошт асобаў, прынятых на дагаворных умовах з поўнай выплатай выдаткаў на навучаньне з сродаў грамадзянаў, сёлета павялічылася колькасьць студэнтаў, прынятых у дзяржаўныя ўстановы адукацыі: у ВНУ - на 3,2 тыс. чалавек (на 5,2%) і ў сярэднія спэцыяльныя навучальныя ўстановы - на 0,7 тыс. чалавек (на 1,3%).

На ўмовах кампэнсацыі выдаткаў у дзяржаўныя ВНУ прынята 31,6 тыс. чалавек (49,2% ад агульнага прыёму), у дзяржаўныя тэхнікумы - 19,5 тыс. (36,2%). За кошт сродкаў бюджэту ў ВНУ прынята 32,6 тыс. студэнтаў (летась - 32,8 тыс.), у сярэднія спэцыяльныя ўстановы - 34,4 тыс. навучэнцаў (летась - 36,4 тыс.).

Падрыхтоўку рабочых кадраў вядуць 246 прафэсыйна-тэхнічных вучэльняў, дзе навучаецца 132,6 тыс. чалавек. Прыём у прафэсійна-тэхнічныя навучальныя ўстановы склаў 54,9 тыс. чал., выпуск кваліфікаваных рабочых - 57,4 тыс. чал.

На пачатак 2002/2003 навучальнага году ў краіне працавала 4.461 дзённая агульнаадукацыйная ўстанова, у тым ліку 108 гімназіяў, 23 ліцэі, 6 навучальных комплексаў школа (гімназія) - каледж.

Колькасьць навучэнцаў у дзённых агульнаадукацыйных установах склала 1.407,8 тыс. чал., зь іх у гімназіях - 87 тыс., у ліцэях - 10,5 тыс., у навучальных комплексах школа (гімназія) - каледж - 2,1 тыс. чалавек. Сёлета ў навучальным годзе ў дзьве зьмены навучаецца 221,9 тыс. навучэнцаў (22,7%).