«Яблоко» просіць Пуціна абараніць расейскія СМІ ў Беларусі :: Хартыя'97 :: Навiны

Лідэр расейскай партыі “Яблоко” Рыгор Яўлінскі і кіраўнік аднайменнага беларускага грамадзкага аб’яднаньня Вольга Абрамава выступілі з адкрытым лістом, у якім выказалі закляпочанасьць сытуацыяй вакол расейскіх электронных СМІ ў Беларусі, паведамляе агенцтва "Интерфакс".

“Закрытае вяшчаньне радыёстанцыяў “Маяк”, “Юность” і “Голас России”, якія доўгія гады былі важнай часткай інфармацыйнай прасторы для беларускіх грамадзянаў”, -- адзначаюць лідэры “Яблока” ў адкрытым лісьце да расейскага прэзыдэнта Ўладзімера Пуціна.

У лісьце, тэкст якога распаўсюджаны ў Маскве 17 студзеня, таксама гаворыцца, што беларусія ўлады не хаваюць сваіх намераў зьмяніць частату вяшчаньня шэрага расейскіх тэлеканалаў. Гэта “пацягне за сабой шматразовае скарачэньне аўдыторыі гледачоў у Беларусі”, - заяўляюць Рыгор Яўлінскі і Вольга Абрамава.

“Акрамя таго, -- адзначаюць лідэры дэмакратычнай апазыцыі дзьвюх краін, -- плянуецца стварэньне на базе тэлеканалаў так званых сумесных вяшчальных арганізацыяў”. Аўтары ліста апасаюцца, што гэта прывядзе да цэнзуры беларускіх уладаў вяшчальнай палітыкі расейскіх мэдыйных карпарацыяў.

Як падкрэсьліваюць аўтары ліста, расейская дэмакратычная партыя “Яблоко” і беларускае грамадзкае аб’яднаньне “Яблоко” лічаць захаваньне адзінай інфармацыйнай прасторы адным з асноўных фактараў супрацоўніцтва і інтэграцыйных працэсаў.

Лідэры “Яблока” просяць Ўладзімера Пуціна “садзейнічаць захаваньню вяшчаньня расейскіх тэлеканалаў на тэрыторыі Беларусі ў тым самым вяшчальным аб’ёме, што і для грамадзян Расеі”.