У 2002 годзе спажывецкія кошты падвысіліся на 34,8% :: Хартыя'97 :: Навiны

У Беларусі спажывецкія кошты падвысіліся за 2002 год на 34,8% супраць 46,1% за 2001 год, у той час як урад прагназаваў, што рост коштаў летась не пераўзыйдзе 27% за год, паведамілі ў Міністэрстве статыстыкі і аналізу.

У сьнежні спажывецкія тавары падаражэлі на 2,5% супраць 3,2% за лістапад.

Сьнежаньскі ўзровень інфляцыі на спажывецкім сэктары быў абумоўлены ў асноўным павелічэньнем тарыфаў на платныя паслугі, якія ўзрасьлі за месяц на 5,6% пасьля росту на 10,9% у лістападзе. У агуле за 2002 год кошты на платныя паслугі для насельніцтва падняліся ў 2 разы.

Больш за астатнія ў сьнежні падаражэлі жыльлёва-камунальныя паслугі - на 9,6% за месяц (на 192,6% за год) і бытавыя паслугі - 4,1% (50,1%).

Кошты на харчовыя тавары павялічыліся за сьнежань на 3,4% пасьля росту на 1,7% за лістапад. Больш за ўсё ў мінулым месяцы падаражэла агародніна (на 30,6% за месяц), цукар (на 7,9%), крупы (на 7,3%), алькагольныя напоі (на 4,1%). У агуле за 2002 год кошты на прадукты харчаваньня падняліся на 25,8%.

Рост коштаў на нехарчовыя тавары спажывецкай групы ў сьнежні запаволіўся да 0,8% за месяц пасьля росту на 1,1% за лістапад. З пачатку 2002 году тавары гэтай групы падаражэлі на 22,1%.

Кошты на прадпрыемствах грамадзкага харчаваньня ў сьнежні павялічыліся на 3,1% пасьля росту на 2,2% у лістападзе. З пачатку года кошты ў грамадзкім харчаваньні падняліся на 34,9%.

У прамысловасьці рост коштаў у сьнежні склаў 2% супраць 7,2% за лістапад. Усяго за 2002 год вытворцы прамысловай прадукцыі павысілі кошты на 42,7%.

Летась найбольшы рост коштаў адзначаўся ў хімічнай галіне - на 130,3%, нафтаперапрацоўчай прамысловасьці - на 50%, паліўнай прамысловасьці - на 47,7% і ў чорнай металюргіі - на 41,9%.

Тарыфы на грузавые перавозкі ў сьнежні павялічыліся на 1,3% пасьля росту на 1,7% у лістападзе. Прырост коштаў на перавозкі чыгункай у сьнежні 1,1%, аўтамабільным транспартам - 1,8%, паветраным транспартам - 1,2%. За 2002 год паслугі грузавога транспарту падаражэлі на 25,3%.

Рост коштаў на будаўніча-мантажныя працы павялічыўся за сьнежань да 2,9% з 0,4% за лістапад. У агуле за 2002 год прырост коштаў ў гэтай сфэры склаў 32,3%.

У 2001 годзе спажывецкія кошты ў рэспубліцы павялічыліся на 46,1% пасьля росту на 107,5% у 2000 годзе. Прырост коштаў у прамысловасьці скараціўся за 2001 год да 39,4% з 167,7% у 2000 годзе.