Пугачоў перадаў Эмілю Лахуду пасланьне ад Лукашэнкі :: Хартыя'97 :: Навiны

Першы намесьнік міністра замежных справаў Беларусі Васіль Пугачоў перадаў у аўторак лібанскаму прэзыдэнту Эмілю Лахуду пасланьне ад Аляксандра Лукашэнкі. Як перадае карэспандэнт РІА "Новости", Пугачоў прыбыў у Бэйрут у панядзелак з двухдзённым візытам для правядзеньня плянавых кансультацыяў у МЗС Лібану. У прэс-бюро лібанскага прэзыдэнта паведамілі, што ў пасланьні прэзыдэнта Беларусі Аляксандра Лукашэнкі падкрэсьленае імкненьне разьвіваць і ўмацоўваць стасункі зь Лібанам у розных абласьцях, асабліва ў вобласьці эканамічнага разьвіцьця. У пасланьні таксама адзначаецца, што на дадзены момант у Беларусі і Лібана склаліся неблагія міжпарлямэнцкія адносіны, а таксама адносіны ў вобласьці адукацыі і эканомікі.

У Беларусі, адзначыў Лукашэнка, разглядаюць Лібан як важнага гандлёвага партнёра на Блізкім Усходзе. У пасланьні адзначаецца імкненьне Беларусі да далейшага пашырэньня эканамічнага і інвэстыцыйнага супрацоўніцтва дзьвюх краінаў, а таксама да ўсталяваньня доўгатэрміновых сувязяў у навуковай, культурнай і ваеннай абласьцях.

Арамя таго, Лукашэнка падкрэсьлівае падтрымку Беларусьсю пазыцыі Лібана, які заклікае да мірнага рашэньня ірацкага крызысу і да аднаўленьня мірнага блізусходняга працэсу на аснове рэзалюцыяў РБ ААН № 242, 338 і 425 і прынцыпаў Мадрыду.

Аляксандар Лукашэнка запрасіў лібанскага прэыдэнта Лахуда наведаць Беларусь з афіцыйным візытам у зручны для яго час.

Васіль Пугачоў з свайго боку падчас сустрэчы зь лібанскім прэзыдэнтам, пацьвердзіў значэньне, якое надаюць у Беларусі разьвіцьцю адносінаў зь Лібанам. Ён выказаў захапленьне дасягненьнямі Лібану ў эканамічным разьвіцьці і будаўніцтве.

Прэзыдэнт Лібану ў сваю чаргу накіраваў у адказ пасланьне да Лукашэнкі, у якім выказаў у ім удзячнасьць за запрашэньне наведаць Беларусь і адзначыў важнасьць для Лібану ўмацаваньня і пашырэньня супрацоўніцтва між двума краінамі ва ўсіх абласьцях. Ён таксама вітаў пазыцыю Беларусі па Блізкім Усходзе ўвогуле і, у прыватнасьці, адносна ірацкага крызысу.