У Менск прыбывае афіцыйная дэлегацыя Вьетнаму :: Хартыя'97 :: Навiны

Па запрашэньні кіраўніцтва абедзьвюх палат “нацыянальнага сходу” Беларусі, 22-24 студзеня адбудзецца афіцыйны візыт старшыні Нацыянальнага сходу Вьетнаму Нгуен Ван Аня, перадае карэспандэнт РІА “Новости”. Як паведаміў на брыфінгу прэсавы сакратар беларускага МЗСу Андрэй Савіных, у часе візыту старшыня Нацыянальнага сходу СРВ будзе прыняты Аляксандрам Лукашэнкам, правядзе сустрэчы з прэм’ер-міністрам Генадзем Навіцкім, старшынёй “палаты прадстаўнікоў” Вадзімам Паповым.

Паводле прэсавага сакратара, у часе надыходзячых сустрэч і перамоваў плянуецца абмеркаваньне пытаньняў двухбаковых палітычных зносінаў, узаемадзеяньня ў рамках міжнародных арганізацыяў, канфэрэнцыяў, Міжпарлямэнцкага зьвязу, а таксама актывізацыі супрацоўніцтва ў гандлёва-эканамічнай, навукова-тэхнічнай і іншых сфэрах.

Заплянаванае наведваньне Нгуен Ван Анем заводу вялікагрузных кар’ерных самаскідаў “БелАЗ” і ААТ “Мотавела”, якія актыўна супрацоўнічаюць зь Вьетнамам.

Андрэй Савіных паведаміў, што ў 2003 годзе адзначаецца дзясятая гадавіна ўсталяваньня дыпляматычных зносінаў паміж дзьвюма краінамі. За гэты час, паводле яго, быў дасягнуты высокі ўзровень палітычнага дыялёгу, які садзейнічае рэалізацыі патэнцыялу ў гандлёва-эканамічнай, навукова-тэхнічнай, адукацыйнай і культурнай сфэрах.