У Горадні адбылася забастоўка прадпрымальнікаў :: Хартыя'97 :: Навiны

Забастоўка прадпрымальнікаў прайшла ў Горадні 22 студзеня. У Горадні не працавалі асноўныя рынкі і міні-рынкі. На самым буйным рынку “Паўднёвы” працаваў усяго адзін толькі прадпрымальнік, на астатніх працавалі некалькі чалавек зь ліку замежнікаў і дзяржаўных прадпрыемстваў. Агульная колькасьць забастоўцаў пераўзышла 8.000 чалавек. Забастоўка арганізаваная Стачачным камітэтам Рэспублікі Беларусь.

Патрабаваньні прадпрымальнікаў застаюцца ранейшымі. Эканамічныя патрабаваньні – вярнуць прадпрымальнікам канфіскаваную па надуманых прычынах маёмасьць і грашовыя сродкі іх уладальнікам, звольніць супрацоўнікаў органаў кантролю, якія дапусьцілі свавольства адносна прадпрымальнікаў, спыніць “разбойныя набегі” супрацоўнікаў сілавых і кантрольных структур на прадпрымальнікаў. Палітычныя – спыніць перасьлед журналістаў і адстаўка Аляксандра Лукашэнкі.

Акрамя таго, у гэты дзень, а 10.00 каля трох сотняў прадпрымальнікаў сабраліся каля Гарадзенскага аблвыканкаму. Ад імя прадпрымальнікаў Валеры Леванеўскі наведаў будынак аблвыканкаму. Ён сустрэўся з намесьнікам старшыні Гарадзенскага аблвыканкаму Радзевічам Аляксандрам Міхайлавічам і абмеркаваў зь ім насьпелыя праблемы. Была дасягнутая дамоўленасьць аб сустрэчы 23 студзеня а 10.00 з прадстаўнікамі аблвыканкаму і кіраўнікамі сілавых структур.