БГК: спыненьне расьсьледваньня “гучных справаў” неабгрунтаванае :: Хартыя'97 :: Навiны

Беларускі Гэльсынскі Камітэт лічыць рашэньне сьледчага пракуратуры г.Менску Ўладзімера Чумачэнкі аб спыненьні папярэдняга расьсьледваньня па справах аб зьнікненьні Юры Захаранкі, Віктара Ганчара і Анатоля Красоўскага несвоечасовым і неабгрунтаваным. На думку БГК, канкрэтныя сьледчыя дзеяньні па вызначэньні абставінаў зьнікненьня апазыцыянэраў не праведзеныя.

Як адзначае Гэльсынскі камітэт, за час папярэдняга расьсьледваньня – больш за тры гады -- сьледзтва так і не сфармулявала праўдападобнае тлумачэньне зьнікненьняў Юры Захаранкі, Віктара Ганчара і Анатоля Красоўскага, ня вызначыла падазраваных. Сьледзтва не праверыла факты аб датычнасьці канкрэтных службовых асобаў дзяржавы да зьнікненьняў, якія знаходзіліся ў апублікаваных матэрыялах з справы №414100 па абвінавачваньні групы Ігнатовіча.

Шматлікія хадайніцтвы пацярпелых, накіраваныя на высьвятленьне праўды па справе, неабгрунтавана адхіленыя: не дапытаныя былы начальнік крымінальнай міліцыі М.Лапацік, міністар унутраных справаў У.Навумаў, экс-міністар унутраных справаў У.Сівакоў, былы сакратар Савету бясьпекі В.Шэйман; не правераная законнасьць і абгрунтаванасьць арышту і хуткага вызваленьня з сьледчага ізалятару КДБ Д.Паўлічэнкі, кіраўніка падразьдзелу СОБР, падазраванага ў арганізацыі гвалтоўных выкраданьняў і, магчыма, фізычнай ліквідацыі зьніклых; не дапытаныя былы генэральны пракурор А.Бажэлка, былы старшыня КДБ У.Мацкевіч, які валодае зьвесткамі, што сталі падставаю да затрыманьня і допытаў Д.Паўлічэнкі ў якасьці падазраванага; не дапытаныя афіцэры і вайскоўцы спэцпадразьдзелаў Службы аховы Прэзыдэнта, Савету бясьпекі, МУС і КДБ – магчымыя ўдзельнікі і сьведкі злачынных падзеяў; не канфіскаваныя з СІЗА-1 УУС Менскага гарвыканкаму і не прыкладзены ў якасьці рэчавага доказу пісталет, які, згодна рапартам А.Алкаева і М.Лапаціка, выкарыстоўваўся пры зьдзяйсьненьні згаданых злачынстваў; не правераныя пададзеныя сьледзтву сьведчаньні, якія ўказваюць на палітычную матывацыю злачынстваў.

Абгрунтаваныя скаргі на дзеяньні сьледчага вышэйшымі пракурорамі не задаволеныя.

Нягледзячы на вялікі грамадзкі інтарэс і міжнародны рэзананс, пра што сьведчыць стварэньне адмысловай камісіі ПАРЭ на чале з Сяргеем Кавалёвым па пытаньнях палітычных зьнікненьняў у Беларусі, вышэйшыя службовыя асобы дзяржавы і органы пракуратуры не даюць інфармацыі аб выніках расьсьледваньня.

БГК лічыць, што прыпыняючы вытворчасьць па справах аб гвалтоўных зьнікненьнях, якія маюць палітычную матывацыю, улады дэманструюць сваё нежаданьне правесьці поўнае і аб’ектыўнае расьсьледваньне і, тым самым, дазваляюць сьцьвярджаць аб іх датычнасьці да гэтых злачынстваў. Дзеяньні ўладаў Беларусі наносяць урон дзяржаўным інтарэсам і прэстыжу краіны, вядуць да міжнароднай палітычнай і эканамічнай ізаляцыі.