Беларусь плянуе ўвесьці паралельнае абарачэньне расейскага рубля :: Хартыя'97 :: Навiны

Нацыянальны банк Беларусі плянуе ўвесьці з 1 ліпеня 2003 году паралельнае абарачэньне разам зь беларускім безнаяўным расейскім рублём. Пра гэта паведаміў старшыня кіраваньня банка Пётар Пракаповіч. Нявырашаным пакуль застаецца толькі тэхнічнае пытаньне. Тэхнічныя магчымасьці і абсталяваньне разьліковага цэнтра беларускага Нацбанка пакуль не дазваляюць праводзіць разьлікі ў дзьвюх валютах. Адначасова з увядзеньнем безнаяўнага расейскага рубля будзе адменены абавязковы продаж валютнай выручкі беларускімі прадпрыемствамі ў расейскіх рублях на Беларускай валютна-фондавай біржы.

Паводле Пракаповіча, на сёньня 40% разьлікаў паміж беларускімі й расейскімі прадпрыемствамі ажыцьцяўляюцца ў нацыянальных валютах дзьвюх краінаў (30% у расейскіх рублях і 10% у беларускіх), а 60% -- у далярах. “Неабходна, каб да 1 студзеня 2004 году ўсе разьлікі паміж прадпрыемствамі дзьвюх краін ажыцьцяўляліся толькі ў нацыянальных валютах”, -- адзначыў Пракаповіч. З 1 студзеня 2004 году будзе ажыцьцяўляцца жорсткая прывязка беларускага рубля да расейскага.

Як сказаў Пракаповіч, нявырашыным пакуль застаецца толькі пытаньне з эмісійным цэнтрам. Для ягонага рашэньня ў другой палове лютага адбудзецца сустрэча прэм’ераў і кіраўнікоў цэнтральных банкаў Расеі й Беларусі. Пры выкананьні пляну сумесных мераў пераход Беларусі на расейскі рубель будзе ажыцьцяўляцца з 1 студзеня 2005 году, сказаў Пракаповіч. Для гэтага Нацыянальнаму банку Беларусі выдадуць бестэрміновы і беспрацэнтны крэдыт у наяўных расейскіх рублях. Яго памер будзе роўны суме наяўных грошай у Беларусі, якія будуць падлягаць абмену. На 1 студзеня 2003 году наяўныя грошы ў абарачэньні складалі 300 млн. Пракаповіч адзначыў, што за 2 гады гэтая сума вырасьце. Нацыянальны банк Беларусі не плянуе ліквідаваць выведзеныя з абарачэньня наяўныя беларускія рублі.