Эўрапарлямэнт адзначае паглыбленьне ізаляцыі Беларусі :: Хартыя'97 :: Навiны

Камітэт замежных справаў Эўрапарлямэнту адзначыў паглыбленьне ізаляцыі Беларусі і заклікаў беларускія ўлады праводзіць эканамічныя і палітычныя рэформы, для таго, каб заключыць пагадненьне з Эўрапейскім Зьвязам.

Адпаведная справаздача, ухваленая на днях камітэтам, была ініцыяваная і падрыхтаваная Пэдра Марсэтам Кампасам. Гішпанскі дэпутат Марсэт Кампас зьяўляецца чальцом Канфэдэратыўнай Групы Эўрапейскіх аб’яднаных левых, а тасама ўваходзіць у Камітэт замежных справаў, правоў чалавека, агульнай бясьпекі і абароннай палітыкі Эўрапарлямэнту.

Эўрапарлямэнт ад 1996 году сьцьвярджае, што ніякае двухбаковае пагадненьне зь Беларусьсю ня можа быць падпісанае, пакуль беларускія ўлады не выявяць выразных намераў паважаць правы чалавека.

У справаздачы Марсэта Кампаса крытыкуецца аўтарытарны стыль Аляксандра Лукашэнкі і рэпрэсіўная палітыка яго рэжыму. У дакумэнце гаворыцца пра зьбядненьне насельніцтва Беларусі, беларускія апазыцыйныя партыі заклікаюцца не ўпусьціць магчымасьці аб’яднаць сілы і мабілізаваць грамадзкую сьвядомасьць у часе сакавіцкіх мясцовых выбараў.

Сябры Эўрапарлямэнту таксама пацьвярджаюць гатоўнасьць падтрымліваць гуманітарныя праграмы дапамогі ахвярам Чарнобыльскай катастрофы.

Справаздача па Беларусі стаіць на парадку дня лютаўскай пленарнай сэсіі ў Страсбуры.