У сераду ў Менску будуць разьвітвацца з Уладзімерам Мулявіным :: Хартыя'97 :: Навiны

У сераду ў Менску будуць разьвітвацца з мастацкім кіраўніком ансамблю “Песьняры”, народным артыстам СССР Уладзімерам Мулявіным.

Як паведаміў РІА "Новости" старшыня Саюзу кампазытараў Беларусі Ігар Лучанок, як чакаецца, у сераду ў акруговым Доме афіцэраў пройдзе грамадзянская паніхіда. Сюды змогуць прыйсьці і разьвітацца зь легендай беларускай і савецкай эстрады прыхільнікі творчасьці Ўладзімера Мулявіна.

У гэты ж дзень раніцай, паведаміў Ігар Лучанок, у Сьвята-Духавым катэдральным саборы Менску адбудзецца адпяваньне сьпевака.

Паводле Ігара Лучанка, труну зь целам Мулявіна прывязуць у Менск на аўтамабілі.

У аўторак, як чакаецца, грамадзянская паніхіда пройдзе ў Маскве ў канцэртнай залі “Россия”.

Кіраўнік беларускага вакальна-інструмэнтальнага ансамблю “Песьняры” Ўладзімер Мулявін памёр у маскоўскай клініцы нэйрахірургіі ў нядзелю каля 8 гадзін раніцы. Апошнія 9 дзён Мулявін знаходзіўся ў аддзяленьні рэанімацыі.

Нагадаем, што 15 траўня 2002 году Ўладзімер Мулявін трапіў у дарожна-транспартнае здарэньне. За некалькі кілёмэтраў ад Менску ягоны аўтамабіль “Мэрсэдэс” на высокай хуткасьці не ўпісаўся ў паварот і ўрэзаўся ў дрэва. Мулявіна даставілі ў Беларускі навукова-дасьледчыцкі інстытут траўматалёгіі, дзе яму паставілі дыягназ “тэтрапарэз, пашкоджаньне сьпінных мазгоў з парушэньнем функцыі тазавых органаў, закрыты пералом-вывіх шостай хрыбеткі, рана ў раёне патыліцы”. Сьпявак і кампазытар быў цалкам паралізаваны. Затым ён праходзіў курс лячэньня ў шпіталі кіраваньня справамі прэзыдэнта Беларусі, а ў верасьні яго прывезьлі ў маскоўскую нейрахірургічную клініку імя Бурдэнкі. Паводле дактароў, ягоны стан “трошкі стабілізаваўся, але заставаўся цяжкім”. У сярэдзіне студзеня стан пагоршыўся, і хворага зноў перавялі ў рэанімацыю. Канчатковы дыягназ і прычына сьмерці ўдакладняюцца.