Лукашэнка будзе патрабаваць з навукоўцаў за дзяржфінансаваньне :: Хартыя'97 :: Навiны

Дзяржава будзе аказваць падтрымку навуцы, бо яна займае важнае месца ў беларускім грамадзтве і зьяўляецца прыладаю рэалізацыі прыярэтэтаў краіны. З такой заяваю выступіў Аляксандар Лукашэнка на сустрэчы зь сябрамі Агульнага сходу Нацыянальнай акадэміі навук (НАН).

Кіраўнік дзяржавы падкрэсьліў, што ў Беларусі створаныя рэальныя стымулы для плённай дзейнасьці навукоўцаў, зьнятыя ўсе абмежаваньні па памерах надбавак навуковым супрацоўнікам за творчыя, вытворчыя дасягненьні. Аднак Аляксандар Лукашэнка адзначыў, што падтрымка навукі будзе аказвацца толькі ў тым выпадку, калі дзейнасьць навукоўцаў будзе даваць рэальны вынік і карысьць.

Беларускі лідэр паставіў перад навуковай грамадзкасьцю шэраг задач, у ліку якіх стварэньне ў рэспубліцы цэльнай эфэктоўнай навукова-інавацыйнай сыстэмы, якая павінна стаць інструмэнтам рэалізацыі Праграмы сацыяльна-эканамічнага разьвіцьця краіны да 2005 г. Аляксандар Лукашэнка таксама падкрэсьліў, што ў полі дзейнасьці навукоўцаў мусяць быць пытаньні падвышэньня канкурэнтаздольнасьці беларускіх тавараў.
Вялікую ролю НАН можа адыграць у рашэньні праблемаў, зьвязаных з энэргетычнай бясьпекаю Беларусі, прымяненьнем больш танных мясцовых паліўных рэсурсаў, увядзеньнем рэжыму эканоміі і энэргаашчаднасьці. “Это - залог независимости страны”, -- адзначыў кіраўнік дзяржавы.