Беларусь – краіна «зьвернутая ў мінулае» :: Хартыя'97 :: Навiны

У межах СНД Беларусь валодае найменшай ступеняй эканамічнай свабоды. Гэта вынікае з дакладу ў “2003 Index of Economic Freedom”, надрукаванага газэтай "The Wall Sreet Journal" і фондам Heritage Foundation. У дакладзе разглядаюцца такія фактары, як грашовая і гандлёвая палітыка, падаткавы цяжар, дзяржаўны ўплыў, банкаўская сыстэма, структура заробку і права на ўласнасьць у 161 краіне. Беларусь сярод гэтых краінаў займае 151-ае месца. Яе эканамічная сыстэма аднесеная экспэртамі да “рэпрэсіўнай”. Яны лічаць яе краінай, “зьвернутай у мінулае”.

Большасьць краінаў-удзельніц СНД у сьпісе знаходзяцца ў апошняй траціне. Армэнія займае сярод іх самае высокае месца (44-е) і аднесеная да катэгорыі “пераважна свабодных” краінаў. Міжнародныя эканамічныя экспэрты перш за ўсё з ухвалой кажуць аб малых абмежаваньнях увозу ў рэспубліку. Імпартныя пошліны ў сярэднем складаюць 1,8%; на многія тавары не існуе ні квотаў, ні ліцэнзіяў. У параўнаньні з 2001 годам у Армэніі зьменшаны падаткавы цяжар, максымальны падатак з даходу складае 20%.

Не нашмат лепей за Беларусь выглядаюць тры цэнтральнаазыяцкія дзяржавы - Узбэкістан (149-е), Туркмэністан (146-е) і Таджыкістан (143-е месца). У аўтараў “2003 Index of Economic Freedom” першыя два лічацца “рэпрэсіўнымі”, а Таджыкістан – “пераважна несвабодным”.