Штогод зь Беларусі эмігруюць 15 дактароў навук і 35-50 кандыдатаў :: Хартыя'97 :: Навiны

Штогод зь Беларусі эмігруюць 15 дактароў навук і 35-50 кандыдатаў навук. Пра гэта паведаміў першы намесьнік старшыні Камітэту па навуцы і тэхналёгіях пры Савеце міністраў Уладзімер Нядзілька 27 студзеня ў Менску на прэсавай канфэрэнцыі, прысьвечанай Дню навукі, які адзначаецца ў апошнюю нядзелю тыдня. “Для Беларусі гэта вялікія лічбы, асабліва калі ўлічыць, што ў першую чаргу зьяжджаюць людзі ў найбольш актыўным узросьце”, -- сказаў У.Нядзілька.

Паводле яго, кіраўніцтва Нацыянальнай акадэміі навук Беларусі (НАНБ) і Камітэту па навуцы і тэхналёгіях пры Савеце міністраў прымаюць меры па спыненьні “ўцечкі мазгоў” з краіны. Зацьверджаная ў 2002 годзе дзяржаўная праграма “навуковыя кадры” дазволіць скараціць страту навуковых кадраў, што адбылася за кошт эміграцыі і сыходу ў іншыя сфэры, лічыць спэцыяліст. Рашэньню праблемы “ўцечкі мазгоў” павінна садзейнічаць таксама праграма разьвіцьця матэрыяльна-тэхнічнай базы навукі.

У.Нядзілька прызнаў, што найбольш дзейсны сродак супраць эміграцыі навукоўцаў – “выроўніваньне ўзроўня жыцьця ў Беларусі і разьвітых краінах”, аднак гэтага ў бліжэйшыя гады, паводле яго, дасягнуць немагчыма.

Віцэ-прэзыдэнт НАНБ Юры Плескачэўскі лічыць, што “ўцечка мазгоў” – цалкам нармальная зьява ва ўсім сьвеце. “Навуковец, як і любы іншы чалавек, шукае, дзе ён лепей зможа рэалізаваць сябе як асоба. Праблема ня ў тым, як стрымліваць, праблема ў тым, як стварыць умовы, каб ня толькі ад нас зьяжджалі навукоўцы, але і прыяжджалі да нас, працавалі і знаходзілі магчымасьць для самарэалізацыі”, -- адзначыў Ю.Плескачэўскі. На яго думку, з зацьвярджэньнем праграмы “навуковыя кадры” зьявілася надзея, што працэс “уцечкі мазгоў” будзе стрымлівацца, а адмена ў 2002 годзе абмежаваньняў росту заробку навукоўцаў праз некалькі гадоў цалкам здыме гэтую праблему.

У кастрычніку 2002 году прэзыдэнт НАНБ Міхаіл Мясьніковіч заявіў, што краіны, куды зьяжджаюць беларускія навукоўцы, павінны кампэнсаваць Беларусі выдаткі на іх падрыхтоўку.