92% менчукоў маюць прэтэнзіі да ўрада :: Хартыя'97 :: Навiны

92 адсоткі жыхароў Менску маюць прэтэнзіі да дзейнасьці ўрада Беларусі. 4 адсоткі – ня маюць прэтэнзіяў і столькі сама ня здольныя адказаць на гэткае пытаньне. Такія вынікі анкетнага апытаньня, якое праводзілася 23-27 студзеня сёлетняга году сацыялягічнай службай “Зеркало” інфармацыйнай кампаніі БелаПАН. Пяцістам менчукам ад 18 гадоў і старэй прапаноўвалася адказаць на пытаньне: “У чым асноўныя прэтэнзіі да дзейнасьці ўрада Беларусі?”

Каля паловы рэспандэнтаў – 47 адсоткаў, заявілі, што ўрад ня можа зладзіць з ростам коштаў, інфляцыяй. Каля траціны апытаных адзначылі, што гэты орган выканаўчай улады ня можа выправіць крызыс эканомікі (38%), спад узроўню жыцьця насельніцтва (37 %), а таксама ня можа забясьпечыць людзей працай (33 %). На думку 27 адсоткаў рэспандэнтаў, урад не клапаціўся аб сацыяльнай абароне насельніцтва. Кожны пяты апытаны абвінаваціў урад у карумпаванасьці, у тым, што ён “дзейнічае, у першую чаргу, у сваіх інтарэсах” (20 адсоткаў) ці ў “інтарэсах прэзыдэнта” (19 адсоткаў). 12 адсоткаў менчукоў зьвярнулі ўвагу на тое, што ўрад ня можа забясьпечыць бясьпеку грамадзянаў, недастаткова эфэктоўна змагаецца з злачыннасьцю. 9 адсоткаў – абвінавачваюць яго ў нізкім прафэсыйным узроўні.

Падчас апытаньня толькі 1 адсотак апытаных менчукоў адзначылі, што ўрад Беларусі “дзейнічае ў інтарэсах замежнага капіталу”.