Праваабаронцу Алега Волчака ў дэпутаты не пусьцілі :: Хартыя'97 :: Навiны

29 студзеня Савецкая тэрытарыяльная выбарчая камісія Менску адмовіла кіраўніку грамадзкай арганізацыі “Прававая дапамога насельніцтву” Алегу Волчаку ў рэгістрацыі кандыдатам у дэпутаты гарсавету. Афіцыйныя прычыны яму абяцалі назваць 30 студзеня. Сам Волчак перакананы, што нагодай для адмовы стала яго праваабарончая дзейнасьць. Ён вядзе справы, зьвязаныя з трагедыяй на Нямізе і бясьсьледным зьнікненьнем экс-міністра ўнутраных справаў Юры Захаранкі.

“Выбары пачалі з “адстрэлу” праваабаронцаў”, -- сказаў А.Волчак у інтэрвію БелаПАН. Паводле праваабаронцы, яму і раней адмаўлялі ў рэгістрацыі кандыдатам у дэпутаты. Упершыню гэта адбылося ў 1999 годзе напярэдадні выбараў у мясцовыя Саветы. Прычынай для адмовы стала адміністратыўнае правапарушэньне Волчака. У 2000 годзе у часе парлямэнцкай кампаніі абраныя ў яго падтрымку подпісы тэрытарыяльная камісія прызнала несапраўднымі. “На гэты раз у нас была мэта не прарвацца ў Саветы, а пахадзіць па кватэрах, патлумачыць людзям іх правы”, -- патлумачыў праваабаронца. Ён перакананы, што ўлада баіцца прававой адукацыі насельніцтва.

Мяне не аднага “высеклі”, - сказаў А.Волчак. Паводле яго, у рэгістрацыі таксама адмовілі яго калегам з “Прававой дапамогі насельніцтву”. “Гэтае рашэньне мы будзем абскарджваць”, -- заявіў праваабаронца.