Лукашэнка: У краіне павінен быць жалезны парадак :: Хартыя'97 :: Навiны

Па даручэньні Аляксандра Лукашэнкі быў распрацаваны комплексны праект закону “Аб барацьбе з карупцыяй”, які 30 студзеня стаў прадметам абмеркаваньня на рабочым паседжанні ў кіраўніка дзяржавы. Карупцыя, перакананы Аляксандар Лукашэнка, - страшэннае зло, іржа, якая зьнішчае ўсё, што стварае грамадзтва. А таму адказнасьць за яе павінна быць самай жорсткай, – заявіў Лукашэнка. Па запатрабаваньні кіраўніка дзяржавы актывізаваная дзейнасьць усіх праваахоўчых органаў па выяўленьні і спыненьні фактаў карупцыі. Новы нарматыўны акт, лічыць Аляксандар Лкашэнка, павінен насіць папераджальны характар і тым самым прадухіляць незаконныя дзеяньні. Але да тых, хто ўжо парушыў закон, прымяняць самыя жорсткія меры пакараньня.

Распрацаваны законапраект утрымлівае шэраг канцэптуальных новаўвядзеньняў, накіраваных на поўнае выкараненьне хабарніцтва ў нашым грамадзтве. У прыватнасьці, значна пашыранае кола суб’ектаў, якія падпадаюць пад дзеяньне закону. Калі раней за карупцыйную дзейнасьць каралі толькі службовых асобаў, то зараз за хабар будуць караць работнікаў дзяржаўных арганізацыяў, дзейнасьць якіх зьвязаная з абслугоўваньнем насельніцтва. Гэта спыніць выпадкі, калі за кошт грамадзянаў нажываюцца работнікі мэдычных, адукацыйных, жыльлёва-камунальных і іншых установаў.

Пашыраны сьпіс карупцыйных правапарушэньняў, комплекс папераджальных мераў, уведзеныя патрабаваньні да чальцоў сям’і службовых асобаў. Яшчэ адно новаўвядзеньне – зараз хабарам лічацца ня толькі падарункі маёмаснага характару, але і падзяка ў выглядзе нейкіх нематэрыяльных ільготаў.
Беларускі лідэр падкрэсьліў, што законапраект павінен ісьці ад жыцьця, якое паказала тыя сфэры, дзе можа завесьціся іржа-карупцыя. Таму Аляксандар Лукашэнка даручыў дапрацаваць праект з тым, каб ён ахопліваў усе магчымыя праявы карупцыі і ўчынкі, якія ёй садзейнічаюць, і найжорсткае пакараньне за гэтыя цяжкія правапарушэньні.

Пры гэтым кіраўнік дзяржавы запатрабаваў, каб уся праваахоўчая сыстэма забясьпечыла барацьбу з карупцыяй, у тым ліку ў сваіх шэрагах.
У краіне мусіць быць жалезны парадак у сфэры барацьбы з карупцыяй, падкрэсьліў прэзыдэнт. “І грамадзтва нас у гэтым падтрымае”, -- перакананы беларускі лідэр.