Гуд бай, Беларусь! :: Хартыя'97 :: Навiны

Хутка родную Беларусь пакіне міністар замежных справаў Міхаіл Хвастоў. Паводле неафіцыйнай інфармацыі, ён атрымаў агрэман і Лукашэнка пасылае яго надзвычайным і паўнамоцным амбасадарам у Вашынгтон.

Чуткі пра тое, што Хвастова кудысьці пашлюць амбасадарам цыркулявалі даўно. Акрамя Парыжу, называўся і Вашынгтон. Паўночнаамэрыканскі мацярык цяперашняму кіраўніку МЗС Беларусі добра знаёмы. Пасьля рэфэфэндуму 1996 году, Хвастоў з пасады намесьніка міністра атрымаў накіраваньне ў Канаду. А ўжо на пасадзе міністра здолеў утрымацца больш за год і зьмяніў на гэтай пасадзе цяперашнега кіраўніка прэзыдэнцкай адміністрацыі Урала Латыпава. Не было ні для каго сакрэтам, што і пры Хвастове усю дзейнасьць замежнапалітычнага ведамства працягваў шчыльна апякаць Латыпаў. Трэба меркаваць, што ён прыклаў сваю руку і да новага прызначэньня Хвастова.

Варта нагадаць, што ў ранзе міністра Хвастоў у канцы леташнега году трапіў у найславуты сьпіс васьмі неўязных у краіны Эўразьвязу і ЗША чыноўнікаў на чале з Лукашэнкам. Але не прозьвішча Хвастоў застаецца пэрсонай нон грата, а пасада міністра замежных справаў. Так што наўрадці можна ўспрымаць атрыманы Хвастовым агрэман, як адмену гэтага сьпіса, на чым настойвае афіцыйны Менск, які ўзамен пагадзіўся адкрыць у сябе офіс АБСЭ. Паводле нашых дадзеных, ім стане Сяргей Мартынаў – амбасадар у Бэльгіі і сталы прадстаўнік у ЭЗ і НАТО. Як вядома, у Брусэль ён трапіў год таму з пасады першага намесьніка міністра замежных справаў. Кажуць, што свайму вяртаньню ў Менск амбасадар ня вельмі ўзрадаваўся. Застаецца невядомым, ці ўзрадуецца і той, хто зьменіць Мартынава ў якасьці амбасадара. А што да Хвастова, то ён, безумоўна, павінен быць задаволены сваім новым прызначэньнем. Усё будзе ж у Новым сьвятле, а не ў тым, які яго суправаджаў у роднай Беларусі.