Вацлаў Гавэл пакінуў пасаду прэзыдэнта Чэхіі :: Хартыя'97 :: Навiны

Прэзыдэнт Рэспублікі Чэхія Вацлаў Гавэл, які займаў сваю пасаду цягам 12 гадоў, у нядзелю пайшоў у адстаўку, паведамляе Reuters. У свой апошні прэзыдэнцкі дзень 66-гадовы Гавэл правёў шэраг сустрэч з палітычнымі лідэрамі і наведаў некалькі мэмарыялаў у Празе, нягледзячы на халоднае нядзельнае надвор’е.

Згодна чэскай канстытуцыі, Гавэл ня мог вылучацца на трэці прэзыдэнцкі тэрмін. Аднак, вельмі верагодна, што калі б такой забароны не існавала, сур’ёзнаю перашкодаю для Гавэла стаў бы стан ягонага здароўя. Зараз ужо былы чэскі лідэр пакутуе на хранічны бранхіт і перанёс запаленьне лёккіх. У 1996 годзе ў выніку хірургічнага ўмяшальніцтва Гавэлу выдалілі дзьве невялікія пухліны і палову правага лёккага.

Чэскія парлямэнтары пакуль не змаглі выбраць пераемніка Гавэла. Былы прэзыдэнт выказаў надзею, што дэпутаты заканадаўчага сходу бліжэйшым часам усё ж такі здолеюць прыйсьці да кампрамісу і разам з тым адзначыў, што пустое прэзыдэнцкае крэсла на некалькі тыдняў ня варта разглядаць як прызнак канстытуцыйнага крызысу.