Партыя БНФ падсумавала вынікі рэгістрацыі сваіх прадстаўнікоў :: Хартыя'97 :: Навiны

Партыя БНФ падсумавала вынікі рэгістрацыі сваіх прадстаўнікоў кандыдатамі ў дэпутаты мясцовых Саветаў. Як паведаміў лідэр партыі Вінцук Вячорка на прэс-канфэрэнцыі, якая была скліканая з гэтай нагоды, з 154 прэтэндэнтаў, вылучаных Партыяй БНФ, зарэгістравана 107 кандыдатаў; адмоўлена ў рэгістрацыі 43; лёс яшчэ чатырох партыйных вылучэнцаў пакуль невядомы. Паводле В.Вячоркі, такія вынікі ня сталі нечаканасьцю для кіраўніцтва партыі і былі “вельмі спрагназаваныя”, бо, як адзначыў палітык, улады робяць усё магчымае, каб прадстаўнікі дэмакратычнай апазыцыі не ўвайшлі ў склады мясцовых Саветаў.

Як адзначыў Вінцук Вячорка, кандыдатам ад Партыі БНФ адмаўлялі ў рэгістрацыі па надуманых прычынах. Найбольш распаўсюджанай прычынай, паводле яго, стала няправільнае запаўненьне дэклярацыі аб даходах і маёмасьці. Напрыклад, у намесьніка старшыні партыі Юры Хадыкі было выяўлена 24 тысячы рублёў незарэгістраванага даходу. Частцы кандыдатаў ад Партыі БНФ адмовілі ў рэгістрацыі з прычыны недакладнасьці подпісаў, сабраных у падтрымку іх вылучэньня. Паводле В.Вячоркі, з гэтай мэтай мясцовыя ўлады аказвалі ціск на грамадзянаў, якія паставілі свае подпісы за кандыдата ад Партыі БНФ, а таксама на саміх кандыдатаў і сябраў іх ініцыятыўных групаў.

Лідэры партыі гатовыя да таго, што бліжэй да выбараў колькасьць астатніх кандыдатаў зьменшыцца. “У нас няма ілюзіяў, што ўсе яны дойдуць да канца выбарчай кампаніі,” -- сказаў Вячорка. На яго думку, астатнія кандыдаты ад Партыі БНФ патрэбныя ўладам для рашэньня двух задачаў: стварыць ілюзію дэмакратычнасьці выбараў і прыцягнуць выбарцаў на ўчасткі для галасаваньня.

Разам з тым, Вінцук Вячорка падкрэсьліў, што гэтая выбарчая кампанія важная перш за ўсё для партыі як магчымасьць правядзеньня шырокай агітацыйнай працы з насельніцтвам і падрыхтоўкі да парлямэнцкіх выбараў 2004 году. Паводле палітыка, мэта цяперашняй кампаніі -- “распавесьці людзям пра тое, што Фронт яшчэ існуе” і што Партыя БНФ -- гэта партыя, якая выступае за эўрапейскія каштоўнасьці і парадак.