Страта працы прывяла да самагубства :: Хартыя'97 :: Навiны

У суботу 1 лютага ў Віцебску прайшло пахаваньне інжынэра тэлезаводу “Віцязь”, які скончыў жыцьцё самагубствам на прадпрыемстве. Калектыў прадпрыемства ў шоку. Былыя супрацоўнікі самагубцы сьцьвярджаюць, што прычынаю ягонага ўчынку стаў страх застацца без працы.

Як перадае Радыё Рацыя, труп інжынэра знайшлі раніцай 31 студзеня ў памяшканьні архіву аднаго з пустых у выніку шырокамаштабных скарачэньняў заводзкіх будынкаў. Прыкладна праз дзьве гадзіны на завод прыехала сьледчая група, якая прыйшла да высновы, што прыкметаў гвалту няма, і чалавек загінуў у вынку самагубства. Паводле сьледчага Першамайскай пракуратуры Віцебску Юры Шыпалава, пасьмяротнага ліста не было знойдзена, аднак супрацоўнікі распавялі пра падаўлены стан, у якім знаходзіўся гэты чалавек пасьля атрыманага ў сярэдзіне сьнежня паведамленьня аб скарачэньні. Да самаго скарачэньня заставалася прыкладна два тыдня.

Паводле супрацоўнікаў, інжынэр Л. прапрацаваў на тэлезаводзе больш за 20 гадоў, амаль з часу ягонага заснаваньня ў канцы 1970-х гадоў. Яму было 45 гадоў. Меў жонку, дачку-студэнтку і сына-школьніка. Пасьля атрыманьня папярэджаньня аб скарачэньні пачаў актыўна шукаць працу, але пазьней у размовах з супрацоўнікамі скардзіўся на дарэмнасьць гэтых пошукаў.

Калектыў “Віцязя” глыбока ўзрушаны здарэньнем. Насуперак вэрсіям адміністрацыі пра душэўную хваробу самагубцы ягоныя супрацоўнікі зьвязваюць сьмерць толькі з страхам згубіць працу. Распавядаюць пра пагрозы самагубства з боку іншых кандыдатаў на скарачэньне. У размовах на “Віцязі” зараз часта згадваюць перадвыбарчы выступ на заводзе Аляксандра Лукашэнкі, які тады публічна паабяцаў падтрымаць завод грашыма і спыніць скарачэньні.