Буйнейшы гатэль Менску адбяруць у новых уладальнікаў :: Хартыя'97 :: Навiны

Падрыхтаваны праект указу Лукашэнкі аб перадачы пакету акцыяў ААТ “Гатэль “Плянэта” Кіраваньню справамі прэзыдэнта. Пра гэта “Известиям” паведаміла крыніца, блізкая да ўрадавых колаў. Афіцыйна гэтую інфармацыю не пацьвердзілі і не абверглі.

Крыніца ў Міністэрстве эканомікі заявіла, што ў канцы студзеня прэзыдуюм Савету міністраў прыняў рашэньне разарваць дамову куплі-продажу акцыяў “Гатэль “Плянэта” зь лібанскай кампаніяй “Робі Роз Груп”. У канцы сьнежня 2001 году беларускі ўрад на інвэстыцыйным конкурсе прадаў 25% дзяржаўны пакет акцыяў “Плянэта” лібанскай кампаніі за 2.4% з умоваю ўкладаньня інвэстыцыяў у рэканструкцыю гатэлю цягам двух гадоў у памеры 4 млн. даляраў (2 млн. даляраў цягам 2002 году і яшчэ па 1 млн. – у 2003 і 2004 годзе). Нагодай для рашэньня ўрада аб спыненьні зьдзелкі стаў той факт, што інвэстар не ўклаў 2 млн. за леташні год.

У той самы час прадстаўнік лібанскае кампаніі “Робі Роз Груп” Максім Агуркоў адзначыў, што пакуль кампанія не атрымоўвала ніякага афіцыйнага паведамленьня аб спыненьні зьдзелкі. Ён падкрэсьліў, што “Робі Роз Груп” з пачатку 2002 году вядзе перамовы з Мінэканомікі і Міністэрствам спорту і турызму аб падпісаньні дакумэту, які вызначае юрыдычны механізм укладаньня інвэстыцыяў. Аднак гэтыя перамовы не займелі посьпеху.