Цукар падаражэе :: Хартыя'97 :: Навiны

Зьмены ўвозу ў Беларусь трасьніковага цукру-сырца з пачатку 2003 году пацягнулі за сабой рост коштаў на выраблены з гэтай сыравіны цукар, паведаміў віцэ-прэзыдэнт Беларускага дзяржаўнага канцэрну харчовай прамысловасьці (“Белдзяржхарчпрам”) Рыгор Пяткевіч. “Зараз складваюцца перадумовы да таго, што 2003 год будзе стабільным па забесьпячэньні ўнутранага рынку Беларусі цукрам”, -- заявіла галоўны таваравед Міністэрства гандлю Беларусі Сьвятлана Піскарова. Прадпрыемствы гандлю ўжо загатавалі звыш 5 тысячаў тонаў цукру. Аднак, значна падвысіўся кошт цукру праз увядзеньне зь сёлетняга году мытнай пошліны ў памеры 95 эўра за кожную тону цукра-сырца, што ўвозіцца ў Беларусь.

Гэта зроблена, паводле Пяткевіч, для ўніфікацыі ўмоваў з Расеяй, у якой дзейнічае такі парадак увозу, а таксама для стымуляваньня разьвіцьця вытворчасьці ў краіне цукру зь беларускіх цукровых буракоў. Як адзначыў Пяткевіч, раней эканамічна выгадна было вырабляць цукар з завезенага цукра-сырца, а не з цукровых буракоў. Пры новай тарыфнай палітыцы сытуацыя кардынальна зьмянілася, -- стала больш эфэктоўна вырабляць бураковы цукар на месцы.

Як паведамляе БелаПАН, кошт трасьніковага цукру ў Беларусі з пачатку году ўжо вырас на 10 адсоткаў і па прапанове “Белдзяржхарчпраму” ў бліжэйшы час падыміцца яшчэ прыкладна на 10 адсоткаў, паведаміў віцэ-прэзыдэнт. Ён таксама заявіў, што цягам году, магчыма, будзе павялічаная квота на ўвоз цукру-сырца. Г.Пяткевіч адзначыў, што зараз ідзе ўзгадненьне графікаў-паставак цукру-сырца. Паводле ягоных словаў, прадпрыемствы будуць загружацца раўнамерна ў любы час году незалежна ад попыту. І зрываў у пастаўцы цукру на ўнутраны рынак ня будзе.