Рабочыя Магілёўскага металюргічнага заводу выказалі недавер свайму кіраўніцтву :: Хартыя'97 :: Навiны

4 лютага работнікі адкрытага акцыянэрнага таварыства “Магілёўскі завод” выказалі недавер кіраўніцтву свайго прадпрыемства. Каля 150 рабочых, большасьць якіх зьяўляюцца акцыянэрамі ААТ, сабраліся ў перапынку ля будынку кіраўніцтва заводу з плякатамі: “Дзе нашыя грошы?”, “Улада, абарані нас!”, “Ганьба Мінпраму!” і іншымі.

Паводле рабочых, сваёй акцыяй пратэсту яны вырашылі выказаць нязгоду зь дзеяньнямі адміністрацыі па кансэрвацыі трубаліцейнага цэху металюргічнага заводу, дзе працуе каля 300 чалавек. Рабочыя распавялі карэспандэнту БелаПАН аб тым, што з восені мінулага году цэх спынены, а ягоныя работнікі адпраўленыя ў адпачынкі зь ініцыятывы адміністрацыі. Іх апошняя месяцовая заробная плата складала 50-70 тысячаў беларускіх рублёў.

Як патлумачыў карэспандэнту БелаПАН старшыня прафкаму ААТ “Магілёўскі металюргічны завод” Канстанцін Конанаў, на заводзе ўтварылася цяжкая эканамічная сытуацыя: няма грошай на набыцьцё расейскай сыравіны, узьніклі праблемы з рэалізацыяй прадукцыі.

Ніхто з адміністрацыі прадпрыемства да рабочых ня выйшаў. Металургі пастаялі каля паловы гадзіны ля дзьвярэй кіраваньня і разышліся па сваіх працоўных месцах. Яны дамовіліся правесьці новую акцыю пратэсту 6 лютага. На гэты дзень прызначаны сход акцыянэраў, дзе, магчыма, будзе вырашацца далейшы лёс трубаліцейнага цэху. Усяго ж на прадпрыемстве працуе каля 1.300 чалавек.