У трох банках прыпыненыя ліцэнзіі на прыцягненьне сродкаў :: Хартыя'97 :: Навiны

За незахаваньне эканамічнага нарматыву мінімальнага памеру ўласных сродкаў прыпынена дзеяньне ліцэнзіі на прыцягненьне ва ўкладаньні сродкаў фізычных асобаў на тэрмін з 1 лютага па 30 красавіка 2003 году ў ААТ "Банк “Залаты талер”, ААТ “Банк “Пошук” і “АКБ “МінскКомплексБанк” ЗАТ.

Аднак ААТ "Банк “Залаты талер” дадзена права ажыцьцяўляць у беларускіх рублях і ў замежнай валюце прыцягненьне грашовых сродкаў фізычных асобаў на падставе дамоваў карт-рахунка, а таксама адкрыцьцё і вядзеньне карт-рахункаў фізычных асобаў, разьліковае і (ці) касавае абслугоўваньне, зьвязаныя з выкананьнем забавязкаў па згаданых дамовах. Яму таксама дазволена вядзеньне разьліковых банкаўскіх рахункаў, разьліковае і касавае абслугоўваньне, зьвязаныя з залічэньнем і выплатай заробнай платы работнікам навукова-вытворчага рэспубліканскага ўнітарнага прадпрыемства “Прагрэс”, адкрытага акцыянэрнага таварыства “Экспэрымэнтальны завод ім.Гастэла”, а таксама зьвязаныя з выплатай стыпендыяў і заробнае платы работнікам і студэнтам установы адукацыі “Інстытут кіраваньня і прадпрымальніцтва”. Банк можа ажыцьцяўляць вядзеньне банкаўскіх рахункаў, разьліковае і касавае абслугоўваньне, зьвязаныя з выплатай страхавых сумаў фізычным асобам па дамовах страхаваньня, заключаных беларускім рэспубліканскім унітарным прадпрыемствам “Белдзяржстрах”, а таксама апэрацыі, зьвязаныя з выкананьнем забавязкаў перад фізычнымі асобамі па раней заключаных дамовах без пераафармленьня і падаўжэньня іх тэрміну.

ААТ “Банк “Пошук” дадзена права весьці банкаўскія рахункі, разьліковае і касавае абслугоўваньне, зьвязанае з залічэньнем і выплатай заробнае платы работнікам РУП “Бабруйскі завод трактарных рухавікоў і агрэгатаў”, а таксама пераафармляць і падаўжаць тэрмін раней заключаных з фізычнымі асобамі дамоваў банкаўскага дэпазыту.

“АКБ “МинскКомплексБанк” ЗАТ дадзена права на правядзеньне апэрацыяў па выкананьні забавязкаў перад фізычнымі асобамі па раней заключаных дамовах без пераафармленьня і падаўжэньня іх тэрміну.