У Берасьці чакаюць выбуху беспрацоўя :: Хартыя'97 :: Навiны

У пачатку 2003 году ў Берасьці адзначаўся рост афіцыйнага беспрацоўя: яе ўзровень падняўся з 1,95 адсоткаў у канцы леташнега году да 2,06 – у студзені. Сёньня на ўліку ў якасьці беспрацоўных лічацца 3.868 берасьцейцаў.

Як сьведчыць статыстыка, шэрагі беспрацоўных папаўняюць у першую чаргу работнікі, зволеныя па скарачэньні штатаў, а таксама выпускнікі школ і ВНУ. 45 адсоткаў беспрацоўных – людзі з вышэйшай адукацыяй. Для іх падыходзіць толькі 10 адсоткаў з усіх вакансіяў. 65 адсоткаў зь ліку беспрацоўных -- жанчыны, якім падыходзіць усяго адна зь дзесяці прапанаваных вакансіяў, перадае БелаПАН.

Летась у гарадзкі Цэнтар занятасьці зьвярнуліся 10.952 чалавек. 7.500 зь іх былі працаўладкаваныя; 991 – накіравалі на перападрыхтоўку; 1.548 з тых, хто стаіць на ўліку, атрымоўваюць матэрыяльную дапамогу. Сёлета чакаецца рост беспрацоўя, лічыць дырэктар гарадзкога Цэнтру занятасьці насельніцтва Ўладзімер Зайцаў. Першая прычына гэтаму – увядзеньне сёлета ў рамках пэнсійнай рэформы пэрсаніфікаванага ўліку на прадпрыемствах; другая – увядзеньне Польшчай візавага рэжыму зь Беларусьсю, што павінна адбыцца да лета 2003 году. Менавіта з гэтае прычыны без сродкаў да існаваньня застануцца тысячы жыхароў Берасьці, якія зараз зарабляюць на “чалночных” паездках у суседнюю дзяржаву. Усе гэтыя людзі будуць вымушаныя зарэгістравацца ў Цэнтры занятасьці і шукаць працу, лічыць Уладзімер Зайцаў.