Урад агучыў пляны прыватызацыі нафтахіміі :: Хартыя'97 :: Навiны

Урад Беларусі агучыў пляны продажу пакетаў акцыяў чатырох буйнейшых прадпрыемстваў нафтахіміі краіны -ААТ "Нафтан" і "Палімір", "Азот" і Гарадзенскага "Хімвалакно". Як паведамілі ў Мінэканомікі рэспублікі, да продажу на інэвстыцыйных конкурсах прапанавана выставіць паэтапна да 2005г. пакеты акцыяў у памеры 43,27% статутнага фонду "Нафтана", 43,19% статутнага фонду "Паліміра", 43,08% статутнага фонду "Азота", а да 2004г. - 43,66% статутнага фонду ААТ "Хімвалакно".

Згодна пастанове ўрада, у пэрыяд 2002-2004гг. штогод на конкурсах будуць прадавацца пакеты акцыяў па 10% статутнага фонду "Нафтана", "Паліміра" і "Азота", а ў 2005г. будуць прададзеныя пакеты ў памеры 13,27%, 13,19% і 13,08% адпаведна. Паводле спэцыялістаў Мінэканомікі, абавязковай умоваю правядзеньня інвэстконкурсаў стане жорсткі продаж пакетаў аднаму інвэстару ў наступнай “зьвязцы”: "Нафтан" - "Палімір", а таксама "Азот"- Гарадзенскае "Хімвалакно".

У Мінэканомікі адзначылі, што інтарэс да набыцьця акцыяў прадпрыемстваў беларускай нафтахіміі выказвалі ў асноўным расейскія кампаніі - "Сибур", "Сургутнефтегаз", "ЛУКОЙЛ", "Славнефть", "Итера" і "ЮКОС" .“Аднак улічваючы вельмі жорсткія ўмовы продажу дзяржпакетаў, а менавіта паэтапны продаж дробнымі пакетамі цягам 3-х гадоў, наўрадці беларускі ўрад можа разьлічваць на добрыя вынікі конкурсу”, - лічаць у Мінэканомікі.

Вызначаны Мінэканомікі пачатковы кошт адной акцыі ААТ “Нафтан” складае 9,234 дал., ААТ "Палімір" - 11,197 даляраў, ААТ "Азот" - 157,65 даляраў, ААТ “Хімвалакно" - 55,169 дал.

Згодна праграме ўраду Беларусі па прыцягненьні замежных інвэстыцыяў у эканоміку краіны, канцэрн "Белнафтахім" павінен прыцягнуць у 2003г. на разьвіцьцё галіны ня менш за 180 млн. дал, у тым ліку 113,5 млн. дал. у працэсе прыватызацыі вышэйпералічаных прадпрыемстваў.